Teymur Kərimli: İTV Yayım Şurasının “Əsasnamə”si yenidən gözdən keçirilir
Bakı, 21 iyul, AZƏRTAC
Sosialyönümlü informativ-maarifçi bir media vasitəsi kimi İctimai Televiziyanın əsas funksiyası - xalqımızın çağdaş qlobal dəyərlərin və milli mentalitetin işığında maariflənməsi, müstəqil respublikamızda demokratik proseslərin daha da dərinləşməsi, milli köklərə bağlı yeni insan tərbiyəsi və bütün bunların sayəsində dövlətçiliyimizin daha da möhkəmləndirilməsi yolunda Azərbaycanın şanlı keçmişi, şərəfli bu günü və parlaq gələcəyi arasında mənəvi körpü rolunu oynamaqdan ibarətdir. Bu müqəddəs missiyanın yüksək səviyyədə, çağdaş qlobal dəyərlərin çağırışlarını milli ənənələrimizlə sintez edilmiş şəkildə yerinə yetirmək üçün İTV-nin peşəkar rəhbərliyi, yüksək texnoloji imkanları vardır. Tərkibi yenilənmiş İTV Yayım Şurasının əsas vəzifəsi isə burada hazırlanan proqramların milli-mənəvi dəyərlərimizlə maksimumu səsləşməsini təmin etmək yolunda televiziya kollektivinə öz ideoloji dəstəyini göstərməkdir.
Bunu AZƏRTAC-a açıqlamasında İTV Yayım Şurasının sədri Teymur Kərimli söyləyib. O bildirib ki, dəyişən dünyamızda baş verən prosesləri yaxından izləmək, geosiyasi şərtlərin diktə etdiyi korrektələri televiziyanın işinə tətbiq etmək əsas vəzifələr sırasında durmaqdadır. Bu məqsədlə Yayım Şurasının “Əsasnamə”si də yenidən gözdən keçirilir və uyğun vəzifələrin daha da konkretləşdirilməsi nəzərdə tutulur. Başlıca məqsədimiz isə Vətənə və xalqa dərin mənəvi tellərlə bağlı olan, öz qəhrəman keçmişi ilə fəxr etməklə bugünkü vətəndaşlıq vəzifələrini də ciddi şəkildə yerinə yetirən, bu yolla parlaq gələcəyini təmin edən Azərbaycan ictimaiyyətinin çağdaş səviyyədə formalaşmasında dövlətimizə və başqa ictimai qurumlara yaxından yardımçı olmaqdır.
“Əlbəttə, çağdaş dünyamızda ənənəvi televiziyanın kəskin təbəddülata uğraması və bu baxımdan zamanın çağırışları ilə ayaqlaşmaq üçün qabaqcıl dünya ölkələrinin təcrübəsindən mütərəqqi zəmində yararlanmaq da qarşıda duran vəzifələr sırasındadır”,- deyə şura sədri qeyd edib.
Bölmənin digər xəbərləri
