TEYMUR RƏCƏBOV: TURNİRLƏR ÇOX ŞEY ÖYRƏDİR
Azərbaycanda şahmat turnirinin keçirilməsi mühüm hadisədir, çünki əsas vəzifələrdən biri qadınlar arasında beynəlxalq birinciliklərin səviyyəsini kişilər arasında turnirlərin səviyyəsinə qaldırmaqdır. AZƏRTAC xəbər verir ki, bunu beynəlxalq qrossmeyster Teymur Rəcəbov Bakıda keçirilən qadınlar arasında ikinci beynəlxalq şahmat turnirinin açılışında bildirmişdir.
Ölkədə şahmatın təbliğinə kömək edən belə yüksək səviyyəli turnirlərin keçirilməsinin zəruriliyini vurğulayan T.Rəcəbov demişdir: “Düşünürəm ki, ölkəmizdə getdikcə daha çox inkişaf edən idman hərəkatı həm də şahmatın, o cümlədən qadın şahmatının yüksəlişinə kömək edir. Turnirlərin əhəmiyyətini qiymətləndirməmək mümkün deyil, çünki onlar çox şey öyrədir. Təkbətək mübarizə aparmaq və yüksək nəticələr əldə edib qələbə qazanmaq vərdişi aşılayır. Bir sözlə, turnirlər ölkənin ümumi şahmat ab-havasına müsbət təsir göstərir”.
Qrossmeysterin sözlərinə görə, Azərbaycanda uşaq şahmatının inkişafı sahəsində vəziyyət çox yaxşıdır. Məsələn, Zaqatalada uşaq şahmat olimpiadasının keçirilməsi çoxlarını sevindirdi. T.Rəcəbov demişdir: “Ölkənin belə uzaq bölgəsində uşaqların, gənclərin şahmata bu qədər maraq göstərməsi məni sevindirdi. Əsası budur ki, məqamı əldən verməyək. Şahmat böyük sürətlə inkişaf edir və digər şahmatçılarımız kimi mən də idmanın bu növünü təbliğ edəcəyəm”.
Bölmənin digər xəbərləri
