Tezliklə Ermənistana bölgənin “qırmızı xətti”nin haradan keçdiyi ətraflı şəkildə izah ediləcək - ŞƏRH
Bakı, 11 sentyabr, AZƏRTAC
Otuz ilə yaxın Ermənistanın işğalı altında qalan torpaqlarımızın azad olunması, həmçinin rəsmi Bakının postmüharibə dövründə ölkənin suveren hüquqlarının qorunması istiqamətində nümayiş etdirdiyi prinsipial, ədalətli və güzəştsiz mövqe təkcə Azərbaycanın milli maraqlarına deyil, bütövlükdə bölgədə xarici maraqların nüfuz müvəkkili statusunda çıxış edən Ermənistan istisna olunmaqla, bütün digər region dövlətlərinin mənafeyinə xidmət edib və bu gün də etməkdədir. Azərbaycan regiona xarici müdaxiləyə imkan verən proseslərin qarşısının alınması istiqamətində genişmiqyaslı fəaliyyəti, təzyiqlərə qarşı qətiyyətli mövqeyi ilə həm də bölgəni xarici maraqların girovuna çevrilməkdən qoruyur. Təəssüf ki, bəzən sağına-soluna baxmadan, tarixi reallıqlara və ədalət prinsiplərinə məhəl qoymadan, emosional yanaşmalarla təfriqəçilərin ətrafında “qırmızı xətt” çəkməyə çalışanlar bu reallıqları kifayət qədər gecikmiş reflektiv reaksiyalarla başa düşməyə və gerçək mənzərəni görməyə çalışırlar.
Bu fikirləri AZƏRTAC-a açıqlamasında siyasi ekspert Elçin Mirzəbəyli deyib.
Siyasi ekspertin sözlərinə görə, Ermənistanın bir dövlət olaraq mövcudluğunun təməlində erməni xalqının dövlət qurmaq iradəsindən daha çox xarici maraqlar dayandığı üçün bu ölkə daim haqsız, əsassız iddialarına bölgədən kənarda dəstək axtarmağa cəhd göstərib. Azərbaycan artıq uzun illərdir ki, rəsmi İrəvanın bu istiqamətdəki fəaliyyəti ilə bağlı açıq mesajlar verir və 44 günlük Vətən müharibəsindən başlayaraq rəsmi Bakının İrəvanın xarici maraqlara xidmət edən səyləri ilə bağlı xəbərdarlıqları daha açıq müstəviyə keçib. Bu, Fransanın və digər Qərb dövlətlərinin bölgəyə müdaxilə etmək niyyətləri, Avropa İttifaqının yarımhərbi missiyası və digər məqamlarda da özünü büruzə verib. Ermənistan nəyin bahasına olursa-olsun öz ərazisindən başlatdığı prosesi bütün bölgəyə daşımaq, region dövlətlərini xarici maraqların təsiri altına salmaq niyyəti güdür. Təəssüf ki, əsassız və məntiqi izahı olmayan bir çox iddialarla vaxt itirən qonşu İran az qala 5 ilə yaxındır Corc Sorosun xidmət etdiyi dairələrin maraqlarını yerinə yetirən rəsmi İrəvanın əsl məqsədi barədə indi açıq danışmağa başlayıb. İndi rəsmi Tehran Ermənistanın Qərbi regiona gətirmək cəhdləri, Ermənistan-ABŞ hərbi təlimləri, Ermənistan baş nazirinin xanımı Anna Akopyanın Ukraynaya səfəri və digər məsələlərlə bağlı narazılığını bildirir. Halbuki ABŞ-Ermənistan hərbi təlimlərinin keçirildiyi “Zar” təlim mərkəzi Birləşmiş Ştatların maliyyə vəsaiti ilə modernləşdirilib. Mərkəzin açılışı ötən il Ermənistan baş naziri Nikol Paşinyan və ABŞ ordusunun Avropa komandanlığının strategiya, planlaşdırma və siyasət üzrə direktoru general-mayor Daniel Lasikanın iştirakı ilə baş tutub. Əslində, İran baş verənlərə ən azı bir il əvvəl etirazını bildirməli idi. Amma gec də olsa, rəsmi Tehranın İrəvanın qütblərarası bəsit manevrlər kontekstində bölgəni xarici maraqların poliqonuna çevirmək cəhdlərinə reaksiya verməsini müsbət dəyərləndirmək lazımdır.
“Bir zamanlar başqa bir qütbün “forpostu” rolunu icra edən Ermənistan bu gün artıq “casus-dövlət” missiyasını yerinə yetirir. İranın və Rusiyanın maraqlarına zidd, həm də kəskin addımlar atır, rəsmi Moskvanın ünvanına ittihamlar səsləndirir, NATO və Aİ-ni hərbi-siyasi müstəvidə bölgəyə gətirmək üçün “dəridən-qabıqdan” çıxır və bununla paralel olaraq, İran və Rusiyadan dəstək istəyir. Beynəlxalq münasibətlər sistemində bu qəbildən olan davranışların hüquqi adı olmasa da, siyasi müstəvidə riyakarlıq və ikiüzlülük adlanır. Amma nə Rusiya və nə də son hadisələr kontekstində İran Nikol Paşinyanın primitiv oyunlarının mahiyyətini anlamayacaq qədər sadəlövh deyillər. Ermənistan səfirinin ilk dəfə olaraq Rusiyanın Xarici İşlər Nazirliyinə çağırılması və ona rəsmi Moskvanın notasının təqdim olunması, İran prezidentinin Ermənistanın baş naziri Paşinyanla telefon danışığında “əcnəbilərlə təlimlər”, “şübhəli səfərlər” və bu qəbildən olan digər ifadələr səsləndirməsi Paşinyanın ömrünü müxtəlif yollarla uzatmağa çalışdığı “divarın” artıq başa çatdığını göstərir”, - deyə E.Mirzəbəyli qeyd edib.
O vurğulayıb ki, regionda bütün məsələlərin yeganə həll yolu Azərbaycan Prezidenti İlham Əliyevin irəli sürdüyü və Türkiyənin də dəstəklədiyi 3+3 formatı ilə bağlı təşəbbüsdür. Artıq İran Prezidenti də regionun bütün məsələlərinin bölgə ölkələri tərəfindən, 3+3 formatında həll olunmasının zəruriliyindən söz açır. Yaxın vaxtlarda bu təşəbbüs çərçivəsində XİN rəhbərlərinin görüşü gözlənilir və növbəti mərhələdə daha yüksək səviyyədə də görüşlərin keçiriləcəyi ehtimalı var. Bu isə onu deməyə əsas verir ki, tezliklə Ermənistanın özünə də bölgənin “qırmızı xətti”nin haradan keçdiyi ətraflı şəkildə izah ediləcək.
Bölmənin digər xəbərləri
