Tovuz rayonu istiqamətində döyüşlərdə şəhid olan hərbi qulluqçuların ailələrinə qayğı göstərilir
Şəhid general-mayor Polad Həşimovun və polkovnik İlqar Mirzəyevin ailələrinə Prezident İlham Əliyev tərəfindən ayrılan mənzillərin sertifikatları təqdim edilib
Bakı, 17 iyul, AZƏRTAC
Tovuz rayonu istiqamətində döyüşlərdə şəhid olan hərbi qulluqçuların ailələrinin Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin tapşırığına əsasən hərtərəfli diqqətlə əhatə olunması və onlara yüksək qayğı göstərilməsi istiqamətində konkret addımlar atılır.
Müdafiə Nazirliyinin mətbuat xidmətindən AZƏRTAC-a bildiriblər ki, Müdafiə naziri general-polkovnik Zakir Həsənovun tapşırığı ilə iyulun 16-da nazir müavini general-leytenant Kərim Vəliyev, eləcə də nazirliyin idarə rəisləri general-mayor Rasim Əliyev, general-mayor Rasim Babayev və digər zabitlər Qəbələ rayonunda şəhid general-mayor Polad Həşimovun və Bakıda şəhid polkovnik İlqar Mirzəyevin ailələrini ziyarət ediblər.
Hər iki ailənin qayğıları ilə maraqlanan Müdafiə Nazirliyinin yüksək rütbəli zabitləri Ali Baş Komandanın və Müdafiə nazirinin başsağlıqlarını bir daha şəhid ailələrinə çatdıraraq, Prezident İlham Əliyev tərəfindən onlar üçün ayrılan mənzillərin sertifikatlarını ailələrə təqdim ediblər.
Söhbət zamanı şəhid general-mayor Polad Həşimovun və polkovnik İlqar Mirzəyevin ailə üzvləri göstərilən diqqət və qayğıya görə dövlətimizin başçısına və nazirliyin rəhbərliyinə minnətdarlıqlarını bildiriblər.
Tovuz rayonu istiqamətində döyüşlərdə şəhid olan bütün hərbi qulluqçuların ailələrinin qayğıları öyrənilir və onların həlli istiqamətində də addımlar atılacaq.
Bölmənin digər xəbərləri
