Trans-Xəzər marşrutu üzrə daşınmaların həcmi 62 faiz artıb
Astana, 11 aprel, AZƏRTAC
2024-cü ildə Trans-Xəzər Beynəlxalq Nəqliyyat Marşrutu (TBNM) üzrə daşınmaların həcmi 62 faiz artaraq, 4,5 milyon ton təşkil edib.
AZƏRTAC “Akord”a istinadla xəbər verir ki, bu barədə Qazaxıstanın nəqliyyat naziri Marat Karabayevin ölkə Prezidenti Kasım-Jomart Tokayevə təqdim etdiyi məruzəsində bildirilib.
Marat Karabayev nazirliyin keçənilki fəaliyyətinin yekunlarına dair məlumat verərkən qeyd edib ki, Qazaxıstan aviaşirkətləri 14 milyon 700 min sərnişin daşımaqla 10 faiz, hava limanlarında 29 milyon 700 min insana xidmət edilməklə 14 faiz, dəmir yolu nəqliyyatı ilə isə 21 milyon sərnişin daşınmaqla 3,9 faiz artım qeydə alınıb.
Bildirilib ki, Nəqliyyat Nazirliyi 2025-ci ildə Avropa, Asiya və Yaxın Şərq istiqamətləri üzrə 19 yeni aviamarşrut işə salmağı planlaşdırıb. Katon-Karaqaya, Zaysana və Kendirli hava limanlarının tikintisinə başlanılıb.
Bundan başqa 125 dəmiryol vağzalı modernizasiya olunur. 5 nəhəng Dostık – Moyıntı, Almatı ətraf xətti, Darbaza – Maktaaral, Ayaqoz – Baxtı və Kızıljar - Moyıntı dəmir yolu layihələrinin reallaşdırılması davam etdirilir.
Qazaxıstan Prezidenti Mərkəz – Qərb maşın yolunun inşasının sürətləndirilməsini, Qərbi Avropa – Qərbi Çin dəhlizinin genişləndirilməsini, TBNM-in inkişafına xüsusi diqqət ayrılmasını, daxili və xarici aviareyslərin sayının artırılmasını, həmçinin nəqliyyat sektoruna investisiyaların cəlb edilməsinı tapşırıb.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
