TÜRKİYƏ AZƏRBAYCAN DƏRNƏKLƏRİ FEDERASİYASI ERMƏNİSTANLA SƏRHƏDLƏRİN AÇILMASINA ETİRAZINI BİLDİRMİŞDİR
Ankara, 13 aprel (AZƏRTAC). Türkiyə Azərbaycan Dərnəkləri Federasiyasının sədri Bilal Dündar Kocaeli şəhərindəki Azərbaycan Evi Dərnəyində mətbuat konfransı keçirmişdir.
Bilal Dündar dərnəklər adından Ermənistanla Türkiyə sərhədlərinin açılması xəbərlərinə qəti etirazını bildirmişdir. Qeyd etmişdir ki, Türkiyənin belə bir addım atması Azərbaycana qarşı arxadan vurulan zərbə olar. Ərazisinin 20 faizi ermənilər tərəfindən işğal edilmiş, 1 milyondan çox qaçqın və məcburi köçkünü olan qardaş Azərbaycanın bu xəbərlərlə bağlı narahatlığını Türkiyə ictimaiyyəti də bölüşür. Türk dünyasının dahi liderləri Mustafa Kamal Atatürk və Heydər Əliyevin vəsiyyətlərinə uyğun olaraq, iki dövlətdə yaşayan bir millət çətin günlərdə bir-birini müdafiə etməli, ümumi düşmənə qarşı mübarizədə birgə olmalıdır. Azərbaycanlılar Türkiyənin qurtuluş müharibəsində Çanaqqalada, Geliboluda, türk əsgərləri isə 1918-ci ildə Bakının bolşevik-daşnak işğalından azad edilməsi üçün döyüşmüşlər.
Federasiya sədri əlavə etmişdir ki, Türkiyəyə sərhədlərin açılması üçün təzyiq edən Qərbin ikili standartlarının bölgəmizdə həyata keçirilməsinə imkan verilməyəcəkdir. Ermənistan sərhədlərin açılması xəyalları ilə yaşamaqdansa, işğal etdiyi torpaqları azad etməli, Türkiyəyə ərazi iddialarından əl çəkməlidir.
Oqtay Bayramov
AZƏRTAC-ın xüsusi müxbiri
Ankara
Bölmənin digər xəbərləri
