Türkiyə sentyabr ayı üzrə ən yüksək ixrac gəlirini cari ildə əldə edib
İstanbul, 2 oktyabr, AZƏRTAC
COVID-19 pandemiyasına baxmayaraq, Türkiyə iqtisadiyyatı sürətlə artmaqda davam edir. Ölkədə sentyabr ayı üzrə ixrac göstəriciləri ötən ilin eyni dövrü ilə müqayisədə 4,8 faiz, avqust ayına görə isə 28,5 faiz artaraq 16 milyard 13 milyon dollar təşkil edib.
AZƏRTAC xəbər verir ki, bu barədə Türkiyənin Ticarət naziri Ruhsar Pekcan deyib.
Nazir bildirib ki, qeyd edilən rəqəm sentyabr ayı üzrə Türkiyədə ixracdan bu günədək əldə olunan ən yüksək göstəricidir. Ötən ay ərzində qızıl istisna olmaqla ölkədə ixrac rəqəmləri idxala nisbətdə 90,9 faiz artıb. Bu artım 9 ay ərzində 84,4 faiz təşkil edib.
COVID-19 pandemiyasının bu ilin əvvəlindən etibarən dünyada bir sıra, o cümlədən iqtisadi çətinliklərə səbəb olduğunu deyən nazir 2020-ci ilin ikinci rübünə nisbətən üçüncü rübdə ixrac rəqəmlərinin ümumilikdə 34,5 faiz artdığını bildirib.
Günel Məlikova
AZƏRTAC-ın xüsusi müxbiri
İstanbul
Bölmənin digər xəbərləri
