Türkiyəli ekspert: Zəngəzur dəhlizi regionun geosiyasi mənzərəsini dəyişə bilər
Bakı, 1 dekabr, Pərvanə Qafarova, AZƏRTAC
Cənubi Qafqazda Zəngəzur dəhlizi ilə bağlı proseslər hələ də tam formalaşmayıb və bölgədəki böyük aktorların rəqabəti fonunda inkişaf edir. Zəngəzur dəhlizinin açılması yalnız Türkiyə və Azərbaycanın yeni nəqliyyat xətti ilə birləşməsi demək deyil, həm də regionun geoiqtisadi strukturunda ciddi dəyişikliklər yaratmaq potensialına malikdir.
Bu barədə AZƏRTAC-a açıqlamasında Boğaziçi Universitetinin Siyasət Elmi və Beynəlxalq Münasibətlər Bölümünün akademiki, doktor Onur İşçi bildirib.
“Belə bir bağlantı Türkiyənin Orta Asiyaya çıxış imkanlarını gücləndirə, Azərbaycanı isə regionun mühüm logistika mərkəzinə çevirə bilər. Lakin bu proses eyni zamanda İran və Rusiya kimi aktorların mövqelərinə yenidən baxmalarını zəruri edəcək. Ona görə də məsələ diqqətlə və çevik diplomatiya ilə idarə edilməlidir”, – deyə Onur İşçi qeyd edib.
Ekspertin sözlərinə görə, Zəngəzur dəhlizinin reallaşması Cənubi Qafqazdakı qüvvələr balansını tədricən Türkiyə–Azərbaycan xətti lehinə dəyişdirə bilər. Lakin uzunmüddətli sabitlik üçün diplomatik koordinasiya həlledici əhəmiyyət daşıyır.
Türkiyə–Azərbaycan münasibətlərinə toxunan akademik Onur İşçi bildirib ki, iki ölkə arasındakı əməkdaşlıq artıq ənənəvi tərəfdaşlıq çərçivəsini aşaraq regional səviyyədə strateji modelə çevrilib. “Enerji təhlükəsizliyi, nəqliyyat kommunikasiyaları və müdafiə sahəsində koordinasiya həm region ölkələri, həm də qlobal aktorlar üçün nəzərə alınmalı yeni siyasi reallıq yaradır. Ankara–Bakı xəttinin strateji xarakter qazanması bölgədə daha balanslı və çoxqütblü siyasi mühitin formalaşmasına töhfə verir”, – deyə ekspert vurğulayıb.
Onun sözlərinə görə, bu model postsovet məkanında ölkələrin daha müstəqil qərarvermə imkanlarını genişləndirir, Azərbaycanın isə suverenlik və təhlükəsizlik hədəflərini daha da möhkəmləndirir.
Bölmənin digər xəbərləri
