ÜAK-ın Rəyasət Heyətinin iclasında bir sıra aktual məsələlər müzakirə edilmişdir
Moskva, 15 oktyabr (AZƏRTAC). Moskvadakı Beynəlxalq Ticarət Mərkəzinin konfrans zalında Ümumrusiya Azərbaycanlılar Konqresinin Rəyasət Heyətinin iclası keçirilmişdir. İclasda bir sıra aktual məsələlər müzakirə olunmuşdur.
İclası aparan ÜAK prezidenti akademik Məmməd Əliyev ÜAK-ın 2011-ci il noyabrın 25-də keçirilmiş üçüncü qurultayının qərarlarında qəbul edilmiş məsələlərin bu iclasın gündəliyində birinci dərəcəli məsələlər olduğunu qeyd etmişdir.
ÜAK-ın icra aparatının rəhbəri Nemət Nağdəliyev təşkilatın işi barədə yarımillik hesabat məruzəsi ilə çıxış etmişdir. Birinci dərəcəli məsələlər nəzərə alınmaqla qəbul edilmiş planın icrası üzərində ətraflı dayanmış N.Nağdəliyevin sözlərinə görə, ÜAK RF Dövlət Dumasına seçkilərdə və Rusiya prezidenti vəzifəsinə seçkilərdə həmvətənlərimizin fəal iştirakının təmin edilməsi vəzifəsini yerinə yetirmiş, prezident seçkilərində ÜAK “Yedinaya Rossiya” partiyasını və Vladimir Putini dəstəkləmişdir. N.Nağdəliyev həm ÜAK-ın özü tərəfindən, həm də ÜAK ilə Azərbaycanın Rusiyadakı səfirliyi, Heydər Əliyev Fondu, RAGT və Moskva Hökumətinin birlikdə həyata keçirdiyi çoxsaylı tədbirləri sadalamışdır. O qeyd etmişdir ki, bu tədbirlərin hamısı Azərbaycanın və Rusiyanın həyatında əlamətdar tarixlərə və mühüm hadisələrə həsr edilmişdir. Natiq ÜAK tərəfindən , o cümlədən Heydər Əliyev Fondu ilə birlikdə həyata keçirilmiş xeyriyyə layihələrinin əhəmiyyətini vurğulamışdır.
ÜAK icra aparatının rəhbəri daha sonra bildirmişdir ki, təşkilat Krasnodar diyarında daşqından zərər çəkənlərə kömək etmiş, digər mühüm ictimai tədbirlərdə iştirak etmişdir. O, ÜAK tərəfindən bu yaxınlarda keçirilmiş, Putinin milli siyasətini dəstəkləyən və millətlərarası ayrı-seçkilik əleyhinə mitinqin əhəmiyyətini, habelə müxtəlif təhsil layihələrində ÜAK-ın iştirakını, o cümlədən ÜAK tərəfindən Rusiya ali məktəblərinə qəbul imtahanları keçirilməsini, habelə Moskvadakı Azərbaycan etnomədəni komponentli 157 nömrəli məktəblə əməkdaşlığı qeyd etmişdir. ÜAK prezidentinin Ulyanovska səfərinin əhəmiyyətini yüksək qiymətləndirən N.Nağdəliyev bildirmişdir ki, bu səfər ÜAK-ın regional bölgəsinin rəhbəri İslam Hüseynova qarşı sui-qəsdlə bağlı istintaqın obyektiv aparılmasına çox kömək etmişdir.
ÜAK Rəyasət Heyətinin üzvü, “Ocaq” Azərbaycan Mədəniyyəti Cəmiyyətinin sədri professor Tofik Məlikli diasporumuzun üzləşdiyi müxtəlif problemlərdən söhbət açmış, azərbaycanlılara qarşı açıq terrora çağıran bəzi rəsmi şəxslərin cəzasız qalması və onların hərəkətlərinə Rusiya rəhbərliyi tərəfindən lazımı qiymət verilməməsi faktını kəskin tənqid etmişdir.
İclas iştirakçıları Tofiq Məliklini 70 illik yubileyi münasibətilə, Rəyasət Heyətinin digər üzvü Səməd Qurbanovu oğlu Aydının anadan olması münasibəti ilə təbrik etmişlər.
“Azerbaydjanskiy konqres” qəzetinin baş redaktoru Rüstəm Arifcanov gündəlikdəki ikinci məsələ - “Azerbaydjanskiy konqres” qəzetinin fəaliyyəti və “Rusiya cəmiyyətində azərbaycanlıların imicinin formalaşmasında onun rolu” barədə hesabat vermişdir. O, ÜAK-ın mətbu orqanının uğurları və problemləri barədə məlumat verərək qeyd etmişdir ki, gələn il qəzetin 10 yaşı tamam olur.
ÜAK-ın kütləvi informasiya vasitələri ilə səmərəli qarşılıqlı fəaliyyətini bundan sonra da davam etdirməyin vacibliyi vurğulanmışdır. Qəzetin fəaliyyətini genişləndirməyin və abunəçilərinin sayını artırmağın zəruriliyi də qeyd edilmişdir. ÜAK-ın Rəyasət Heyətinin üzvü Səməd Qurbanov qəzetin elektron versiyasının və Konqres xəbərlərinin soydaşlarımıza göndərilməsi formatını təklif etmişdir.
İclasda “ÜAK-ın Nizamnaməsinə Üçüncü qurultay tərəfindən qəbul edilmiş dəyişikliklərin qeydiyyatı üzrə aparılmış iş haqqında”, “ÜAK-ın təhsil sahəsində fəaliyyətinin yaxşılaşdırılması haqqında”, “ÜAK-ın yeni regional bölmələrinin təsdiq edilməsi və onların fəaliyyəti haqqında” məruzələr də dinlənilmişdir.
İclasda cari məsələlər, habelə təşkilatın işinin təkmilləşdirilməsi, fəaliyyətinin səmərəsinin və rəqabət qabiliyyətinin artırılması ilə bağlı bir sıra digər aktual məsələlər müzakirə olunmuşdur.
Asya Hacızadə
AZƏRTAC-ın xüsusi müxbiri
Moskva
Bölmənin digər xəbərləri
