Ukrayna Almaniyadan yeni hərbi yardım paketi alacaq
Kiyev, 11 aprel, AZƏRTAC
Ukrayna Almaniyadan yeni hərbi yardım paketi alacaq. Bu paketə Kiyevin uzun müddətdir ki, xahiş etdiyi mühüm silahlar daxil olacaq.
AZƏRTAC “The Guardian”a istinadla xəbər verir ki, bu barədə Almaniyanın müdafiə naziri Boris Pistorius bildirib. Almaniya daha dörd “IRIS-T” hava hücumundan müdafiə sistemini raketlərlə və “Patriot” sistemləri üçün daha 30 raketlə təmin edəcək.
O, həmçinin bildirib ki, Avropa liderləri Ukraynanın lisenziya əsasında yerli raket istehsal etmək istəyini müzakirə edəcəklər.
Bundesverin məlumatına görə, paketə digər silah-sursatla yanaşı, 15 “Leopard 1” əsas döyüş tankı, pilotsuz kəşfiyyat təyyarəsi və əlavə 100 min artilleriya mərmisi də daxildir.
Bütün paketə 300 idarə olunan raketi olan 4 “IRIS-T” hava hücumundan müdafiə raket sistemi, 15 “Leopard 1A5” əsas döyüş tankı, 300 pilotsuz kəşfiyyat uçuş aparatı, 120 MANPADS, 14 artilleriya sistemi, 100 yer müşahidə radarı, 30 “Patriot” idarəolunan raketi, 5 döyüş maşını və 100 min ədəd patron daxildir.
Pistorius, həmçinin yaxın illərdə yeni “İris-T” sistemlərinin, eləcə də 1100 əlavə yerüstü müşahidə radarlarının tədarükü perspektivindən danışıb.
Almaniyanın müdafiə nazirinə Ukraynada Avropa qoşunlarını da daxil edə biləcək dəstək qüvvələrinin yaradılması planları barədə də sual verilib, lakin o, “bu cür məsələləri müzakirə etməməyə” və “ağıllı və iddialı” qalmağa üstünlük verəcəyini bildirib. O əlavə edib: “Biz lazım olan yerə çatmağın bir yolunu tapacağıq, lakin o vaxta qədər bunu ictimai şəkildə deyil, daxildə müzakirə etmək daha yaxşıdır”.
Xəbər verdiyimiz kimi, bu yaxınlarda Avropa ölkələrinin müdafiə nazirləri Ukraynada potensial qoşun yerləşdirilməsi ilə bağlı yeni danışıqlar aparıblar.
Kiyev
Bölmənin digər xəbərləri
