Ukrayna “Ramştayn”dan rekord həcmdə yardım alacaq
Kiyev, 11 aprel, AZƏRTAC
Bu gün Ukraynanın Müdafiəsi üzrə Təmas Qrupunun növbəti iclası zamanı Kiyevə 21 milyard avrodan (23,85 milyard dollar) çox məbləğdə dəstək elan edilib.
AZƏRTAC xəbər verir ki, bunu Böyük Britaniyanın müdafiə naziri Con Hili Təmas Qrupunun iclası zamanı bəyan edib.
“Bu gün “Ramştayn” qrupu çərçivəsində elan olunan yeni yardım 21 milyard avrodan çoxdur. Bu, Ukraynaya hərbi yardım sahəsində rekord göstəricidir”, – deyə Hili bildirib.
Dünyanın onlarla ölkəsinin iştirak etdiyi “Ramştayn” iclası Ukraynanın Müdafiəsi üzrə Təmas Qrupunun müntəzəm görüşlərinin adıdır. İlk görüş 2022-ci ildə Almaniyada yerləşən ABŞ-ın “Ramştayn” hərbi bazasında keçirilib və adını da oradan alıb.
Bu iclasların məqsədi Ukraynaya Rusiyaya qarşı müharibədə hərbi yardımın koordinasiyası, müdafiə ehtiyaclarının müzakirəsi, silah tədarükü, hərbçilərin təlimi və uzunmüddətli dəstəklə bağlı məsələlərin həllidir.
“Ramştayn” iştirakçıları NATO ölkələri, Avropa İttifaqı dövlətləri və Ukraynanın digər tərəfdaşlarıdır. Bu görüşlər tanklar, hava hücumundan müdafiə sistemləri, artilleriya və digər silah növlərinin verilməsi ilə bağlı qərarların qəbul olunduğu əsas platformaya çevrilib.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
