Ümumdünya Şəhərsalma Forumunun ISO20121 standartına uyğun keçirilməsi nəzərdə tutulur VİDEO
Bakı, 26 dekabr, AZƏRTAC
Ümumdünya Şəhərsalma Forumunun təşkili zamanı davamlı inkişaf prinsiplərinə xüsusi önəm verilir və tədbirin ISO20121 standartına uyğun keçirilməsi nəzərdə tutulur.
AZƏRTAC xəbər verir ki, bu barədə WUF13 Azərbaycan Əməliyyat Şirkətinin media əlaqələri üzrə meneceri Eldar Rəsulov jurnalistlərə açıqlaması zamanı deyib.
Onun sözlərinə görə, tədbirin keçiriləcəyi məkan Bakı Olimpiya Stadionudur və hazırda tədbirin geniş miqyasına uyğun infrastruktur hazırlanır.
“Artıq tikinti işlərinə start verilib. Stadionda ümumilikdə 92 min kvadratmetri əhatə edəcək konfrans zallarının və digər infrastrukturun quraşdırılması nəzərdə tutulur. Forum çərçivəsində təşkil olunacaq “Urban Expo” sərgisində 35 min kvadratmetr sahədə ölkələr, şəhərlər, bələdiyyələr, regional qurumlar, BMT təşkilatları, akademik institutlar, beynəlxalq maliyyə və vətəndaş cəmiyyəti təşkilatları, fondlar və özəl şirkətlər iştirak edə biləcək. WUF13-də iştirak üçün qeydiyyat prosesi cari ilin sentyabr ayından BMT-Habitatın rəsmi internet səhifəsində başlanıb. Forum zamanı iştirakçıların rahat şəkildə məkana gəlməsi üçün nəqliyyat məsələlərinə xüsusi diqqət yetirilir. Nəqliyyat Mübadilə Mərkəzlərinin Baş Planı hazırlanıb və 11 nəqliyyat “hub”ı müəyyən edilib. Marşrutların Heydər Əliyev Beynəlxalq Hava Limanı, otellər, şəhər mərkəzləri və Bakı Olimpiya Stadionu istiqamətləri üzrə tərtib olunur”, - deyə E.Rəsulov diqqətə çatdırıb.
E.Rəsulov əlavə edib ki, WUF13 zamanı təhlükəsizlik və insan axınına nəzarət məsələləri xüsusi əhəmiyyət kəsb edir: “Bununla bağlı hüquq-mühafizə orqanları ilə mütəmadi görüşlər keçirilir və tədbir zamanı məkanda BMT-nin təhlükəsizlik xidməti tərəfindən də nəzarət həyata keçiriləcək. Forumun keçirilməsi Azərbaycanın son onillikdə ev sahibliyi etdiyi beynəlxalq tədbirlər nəticəsində formalaşdırdığı yüksək təşkilati və əməliyyat potensialının davamı kimi dəyərləndirilir. Xüsusilə COP29 zamanı on minlərlə iştirakçının, yüzlərlə rəsmi nümayəndə heyətinin və beynəlxalq medianın cəlb olunduğu proseslər ölkənin logistika, təhlükəsizlik, nəqliyyat, könüllülər proqramı, akkreditasiya və media əməliyyatları üzrə hazırlıq səviyyəsini nümayiş etdirmiş və bu təcrübə WUF13 üçün möhkəm institusional baza yaradıb. Bütün bunları nəzərə alaraq, əminliklə deyə bilərik ki, WUF13 yüksək səviyyədə təşkil olunacaq və ölkəmizin şəhərsalma inkişafına öz töhfəsini verəcək”.
Qeyd edək ki, ISO20121, tədbirlərin təşkili zamanı davamlılıq prinsiplərini rəhbər tutan beynəlxalq idarəetmə sistemi standartıdır. Bu standart hər hansı bir tədbirin (konfrans, festival, idman yarışı və s.) ətraf mühitə mənfi təsirini minimuma endirmək və sosial-iqtisadi faydasını maksimuma çatdırmaq üçün yaradılıb.
Bölmənin digər xəbərləri
