UNESCO-da Azərbaycan Milli Komissiyasının fəaliyyəti haqqında məlumat verilib
Paris, 8 aprel, AZƏRTAC
UNESCO-nun İcraiyyə Şurasının 221-ci sessiyası çərçivəsində Milli komissiyaların ənənəvi iclası keçirilib. İclasda Azərbaycan-UNESCO əməkdaşlığından söz açılıb.
AZƏRTAC xəbər verir ki, UNESCO-nun İcraiyyə Şurasının 221-ci sessiyası çərçivəsində keçirilmiş UNESCO üzrə Azərbaycanın Milli Komissiyasının nümayəndəsi Günel Zülfüqarova Milli komissiyaların ənənəvi iclasında çıxış edib.
Azərbaycan-UNESCO əməkdaşlığından söz açan Milli Komissiyanın nümayəndəsi bu əməkdaşlıq çərçivəsində 2024-2025-ci illərdə reallaşdırılmış və nəzərdə tutulan tədbirlər, eləcə də Milli Komissiyanın layihələri barədə ətraflı məlumat verib.
Həmçinin Azərbaycan Respublikası Mədəniyyət Nazirliyinin təşkilatçılığı ilə Heydər Əliyev Mərkəzində “Qədim insan məskənlərinin mühafizəsi: təhdidlər və müasir yanaşmalar” mövzusunda təşkil edilmiş beynəlxalq elmi-praktik konfrans haqqında danışıb. Bu konfransda UNESCO-nun da yüksək səviyyədə təmsil olunduğu diqqətə çatdırılıb. Tədbirə digər ölkələrin ekspertləri, tədqiqatçıları və qeyri-hökumət təşkilatlarının (ONG) da qatıldığı bildirilib.
Azərbaycanın ev sahibliyi etdiyi BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29), bu sessiyada UNESCO nümayəndələrinin iştirakı haqqında məlumat verilib.
UNESCO üzrə Azərbaycan Milli Komissiyasının ADA Universiteti ilə birlikdə Afrikanın bir çox ölkəsinin UNESCO üzrə Milli komissiyalarının baş katibləri, eləcə də bu ölkələrin inkişafına dəstək kimi təşkil edilmiş təlim proqramlarından və onların gələcəkdə də davam etdiriləcəyindən danışılıb.
Bölmənin digər xəbərləri
