Bakı, 6 fevral, AZƏRTAC

ABŞ Beynəlxalq İnkişaf Agentliyinin (USAID) ləğv ediləcəyinin proqnozunu Azərbaycan Prezidenti hələ ötən ilin sonunda vermişdi. Dövlətimizin başçısı dekabrda bildirmişdi ki, Donald Tramp USAID-i qadağan edə bilər. Ötən həftə Tramp administrasiya ABŞ-ın xarici yardımlarını dondurub. Hətta amerikalı sahibkar İlon Mask USAID-i çoxsaylı cinayət əməllərində, həmçinin Çin laboratoriyasını maliyyələşdirməkdə, yəni koronavirusu yaymaqda ittiham edir. Bu səbəbdən də təşkilatdan amerikalı vergiödəyiciləri qarşısında hesabat vermək tələb olunur.

Bu sözləri AZƏRTAC-a açıqlamasında Milli Məclisin deputatı Nigar Məmmədova söyləyib.

Deputat bildirib ki, USAID-in Əfqanıstanda heroinin yetişdirilməsinə maliyyə dəstəyi verməsinə, xarici hökumətləri devirmək üçün Latın Amerikasında QİÇS-in qarşısının alınması üzrə saxta seminarlar təşkil etməsinə dair faktlar da bu təşkilatın iç üzünü açır.

Əslində, USAID ABŞ-ın dünyada xaos yayan, hakimiyyət çevrilişləri həyata keçirən, vətəndaş qarşıdurması yaradan mexanizmidir. USAID illərlə dünyanın müxtəlif bölgələrində müstəqil xarici siyasət yürüdən dövlətlərin daxili işlərinə qarışaraq, inqilablara sponsorluq edirdi. Bu qurum bir çox beynəlxalq media qruplarına böyük maliyyə dəstəyi verməklə müstəqil siyasət yürüdən dövlətlərə qarşı qarayaxma kampaniyaları təşkil edib.

“USAID vaxtilə ələ keçirdiyi mediaları saxlamaq və genişləndirmək üçün hər il milyardlarla pul xərcləyirdi. Cənubi Qafqazda da müxtəlif yollarla ənənəvi dəyərləri dağıdaraq, üzdəniraq ideyaları təbliğ edən məhz USAID idi. Qonşu Gürcüstanda inqilab cəhdi də USAID-in məkrli planının tərkib hissəsi olub. 2020-ci ildə bu ölkədə keçirilən seçkilərin nəticələri ilə bağlı saxta hesabatlar hazırlandı, seçkilərin saxtalaşdırıldığı iddia edildi. Sonradan bu saxta iddiaların hamısı ifşa olundu.

USAID 2000-ci illərin əvvəllərində Azərbaycanda da xaos ssenariləri həyata keçirməyə çalışmışdı. Məqsəd isə aydın idi - Azərbaycanın inkişafına mane olmaq, ərazi itkisi ilə razılaşmaq planını reallaşdırmaq. Bu destruktiv davranışlardan aydın oldu ki, onlar Prezident İlham Əliyevin siyasətinin Azərbaycan xalqı tərəfindən dəstəklənməsini, sadəcə, həzm edə bilmirlər”, - deyə N.Məmmədova vurğulayıb.

Deputatın sözlərinə görə, USAID-in rəhbərliyində Samanta Pauer kimi qatı anti-Azərbaycan mövqeli şəxsin olması da təsadüfi deyildi. Ermənipərəst Samanta Pauer və USAID faktiki olaraq Azərbaycanın ərazi bütövlüyünə qarşı fəaliyyət göstərirdi. İşğal dövründə Qarabağ separatçılarını dəstəkləyərək öz xislətlərini açmış olurdular. Sosial layihələr adı altında Azərbaycanın dövlət orqanlarına və cəmiyyətin müxtəlif təbəqələrinə nüfuz edərək öz məkrli planlarını reallaşdırmağa can atırdılar. Amma təbii ki, ölkəmizə qarşı həyata keçirilən hibrid təhdidlər və beynəlxalq dezinformasiya kampaniyaları nəticə vermədi. Bu gün USAID cinayətkar struktur kimi ifşa olunur.