“Uşaqların dövrün tələbləri ilə uzlaşan muzeylərə inteqrasiyası” mövzusunda tədbir keçirilib
Bakı, 17 may, AZƏRTAC
Mayın 17-də Abdulla Şaiqin mənzil-muzeyində 18 May - Beynəlxalq Muzeylər Günü münasibətilə “Uşaqların dövrün tələbləri ilə uzlaşan muzeylərə inteqrasiyası” mövzusunda musiqili-poetik tədbir keçirilib.
Muzeydən AZƏRTAC-a bildirilib ki, tədbir “Gənc şairlər” ədəbi uşaq layihəsinin birgə təşkilatçılığı ilə baş tutub. Tədbir Beynəlxalq Muzeylər Günü münasibətilə ICOM-un 2025-ci il üçün müəyyən etdiyi “Sürətlə dəyişən icmalarda muzeylərin gələcəyi” mövzusuna uyğun şəkildə təşkil olunub. Tədbirin konsepsiyasını müasir dövrdə uşaqların maraqlarına və inkişaf ehtiyaclarına uyğun şəkildə muzeylərin onların təlim-tərbiyə prosesinə cəlb olunması təşkil edir.
Muzeyin direktoru Ülkər Talıbzadə çıxışında Abdulla Şaiqin pedaqoji fəaliyyətə başladığı ilk vaxtlardan bu yolda qarşılaşdığı çətinliklər, uşaqların maariflənməsi, ana dilində təhsil almaları uğrunda apardığı mübarizə haqqında ətraflı məlumat verib. Sonra muzeyin əməkdaşı Ülviyyə Əliyeva “18 May - Beynəlxalq Muzeylər Günü Abdulla Şaiqin mənzil-muzeyində” adlı məruzə ilə çıxış edib. O qeyd edib ki, muzeylər yalnız mədəniyyət sahəsində deyil, həm də turizm, təhsil və sosial xidmətlər kimi sektorlarda yeni iş yerləri yaradaraq iqtisadi canlanmaya töhfə verir. Onlar könüllüləri, bələdçiləri, tədqiqatçıları və yaradıcı sənət sahiblərini birləşdirən canlı iş mühitinə çevrilir.
“Gənc şairlər” layihəsinin rəhbəri, Azərbaycan Yazıçılar Birliyinin və Dünya Yazıçılar Təşkilatının (WOW) üzvü Lalə Həsənova tədbirdə layihənin missiyası və uşaqların yaradıcılıq baxımından inkişafında muzeylərin rolundan danışıb.
Gənc poeziyasevərlər görkəmli uşaq yazıçısı Abdulla Şaiqin Azərbaycan və rus dillərində sevilən şeirlərini səsləndiriblər. Bununla yanaşı, musiqi əsərləri ifa edilib.
Sonda gənc istedadlara təşəkkürnamə təqdim olunub.
Bölmənin digər xəbərləri
