UŞAQLARIN PROBLEMLƏRİ DİQQƏT MƏRKƏZİNDƏDİR
Səbail Rayon İcra Hakimiyyətinin başçısı Sahib Ələkbərov 18 Oktyabr - Dövlət Müstəqilliyi günü münasibətilə tədbir iştirakçılarını təbrik edərək bildirmişdir ki, 15 il ərzində əldə etdiyimiz ən başlıca nailiyyət - Azərbaycanın dünya səviyyəsində yeni bir dövlət kimi qəbul edilməsi, ölkəmizin müstəqil siyasət həyata keçirməsidir və bütün bunlara görə biz ümummilli lider Heydər Əliyevə minnətdarıq. Natiq ulu öndər Heydər Əliyevin siyasi xəttinin layiqli davamçısı, oktyabrın 15-də Prezidentlik fəaliyyətinin üçüncü ildönümünü qeyd etdiyimiz İlham Əliyevin dövlətimizin başçısı kimi qarşısında duran vəzifələri böyük fədakarlıqla, əzmlə, ardıcıllıqla həyata keçirməsini faktlarla diqqətə çatdırmışdır. S.Ələkbərov, həmçinin rayonda qazanılmış nailiyyətlər, aparılan tikinti-quruculuq, abadlıq işləri barədə də məlumat vermişdir.
Ailə, Qadın və Uşaq Problemləri üzrə Dövlət Komitəsinin sədri (AQUPDK) Hicran Hüseynova, AQUPDK-nın şöbə müdiri Sənubər Əlizadə, Səbail Rayon İcra Hakimiyyəti başçısının müavini Xalidə Bayramova, fəlsəfə elmləri doktoru Rəna Mirzəzadə və başqaları Dövlət Proqramının məqsədi, əsas vəzifələri, həyata keçiriləcək tədbirlər planı haqqında ətraflı danışmışlar. Bildirilmişdir ki, proqramın əsas məqsədi dövlət uşaq müəssisələrində olan uşaqların ailələrə verilməsi və alternativ qayğının təşkili mexanizmlərinin yaradılması və səmərəli işləməsinin təmin edilməsidir. Bütün dünya ölkələri qarşısında ciddi problem kimi duran bu məsələ, Azərbaycanda kəskin xarakter almasa da, rəsmi məlumatlara görə, uşaq və körpələr evində, internat məktəblərində 21 minə yaxın uşaq tərbiyə alır və hazırda bu say artır. Bütün bunların qarşısını almaq məqsədi ilə ölkəmizin Prezidenti tərəfindən 2006-cı il 29 mart tarixli Sərəncamla Dövlət Proqramı təsdiq edilmişdir.
Çıxışçılar proqramdan irəli gələn vəzifələrin həyata keçirilməsində beynəlxalq təşkilatlarla əlaqələrin genişləndirilməsinin əhəmiyyətini, mövcud qanunvericilikdə dəyişiklik edilməsinin və respublikamızdakı bütün əlaqədar təşkilatların səylərinin birləşdirilməsinin vacibliyini vurğulamış, arzu və təkliflərini bildirmişlər.
Bölmənin digər xəbərləri
