Valentina Veretskaya: Bakı marafonunda qadınlar arasında finişə birinci çatdığım üçün xoşbəxtəm
Bakı, 15 may, AZƏRTAC
Bakıda keçirilən marafonda birinci dəfədir iştirak edirəm. Marafonda qalib gəldiyim üçün çox sevincliyəm. Ən böyük arzularımdan birinə nail oldum və finişə birinci çatdım. Növbəti illərdə bir daha paytaxtınıza gəlməyi planlaşdırıram. Bu idman növü ilə peşəkar səviyyədə məşğulam. Ötən il Albaniyada keçirilən marafonda da birinci yer tutmuşdum. 2019-cu ildə Almaniyada üçüncü olmuşdum. Bu yarışın təşkilində əməyi olanlara təşəkkür edirəm. Belə möhtəşəm yarışlar təşkil etdiyinə görə Heydər Əliyev Fonduna minnətdarlığımı bildirirəm.
Bu fikirləri AZƏRTAC-a müsahibəsində “Bakı Marafonu 2022”də qadınlar arasında yarışda birinci yeri tutan ukraynalı iştirakçı Valentina Veretskaya söyləyib.
V.Veretskaya, həmçinin deyib: “Hələ ilk dəfə Bakıya gələndə buranı çox bəyənmişdim. Xalqınız çox qonaqpərvərdir, burada çoxlu dostlarım var. Bakı çox gözəldir, insanları isə mehribandır”.
Xatırladaq ki, Azərbaycan vətəndaşları ilə yanaşı, ölkəmizdə yaşayıb çalışan əcnəbilər, eləcə də bir sıra digər ölkələrdən nümayəndələr marafonda iştirak üçün müraciət ediblər. Qeydiyyatdan keçənlər arasında Türkiyə, ABŞ, Almaniya, BƏƏ, Böyük Britaniya, Çin, Fransa, Kamerun, Nigeriya, Qazaxıstan, Rusiya, Ukrayna, Uqanda və digər ölkələrdən iştirakçılar var.
Bölmənin digər xəbərləri
