VI Qitələrarası Geoinformasiya Günləri – beynəlxalq konfrans
Bakı, 14 iyun, AZƏRTAC
Elm və Təhsil Nazirliyinin akademik Həsən Əliyev adına Coğrafiya İnstitutu və Türkiyənin Mersin Universitetinin təşkilatçılığı ilə Ulu Öndər Heydər Əliyevin 100 illik yubileyinə həsr olunmuş VI Qitələrarası Geoinformasiya Günləri (IGD)” adlı beynəlxalq konfrans keçirilib.
İnstitutdan AZƏRTAC-a bildirilib ki, tədbirin məqsədi geoinformatika sahəsində kritik problemlərin həlli yollarını, qabaqcıl prinsipləri araşdırmaq, müzakirə etmək və inkişaf etdirmək üçün akademik, elmi dairələr, sənaye və dövlət müəssisələrindən olan tədqiqatçı və mütəxəssisləri bir araya gətirmək olub.
Beynəlxalq konfransda Coğrafiya İnstitutunun baş direktoru coğrafiya elmləri doktoru Zakir Eminov və Mersin Universitetinin Geomatika Departamentinin müdiri Murat Yakar çıxış ediblər.
Tədbirdə institutun şöbə müdiri coğrafiya elmləri doktoru Səid Səfərov bildirib ki, beynəlxalq konfransa 11 ölkədən 105 məruzə təqdim olunub. Təqdimatların 48-i Türkiyə, 29-u Azərbaycan, 13-ü İran, qalanları isə digər ölkələrə aiddir. Proqrama geodeziya, məsafədən zondlama, fotoqrammetriya, torpaq idarəçiliyi, kartoqrafiya, CİS və geodeziya sahələrində, o cümlədən qabaqcıl təcrübə və yeni tədqiqatlar üzrə onlarla təqdimat daxil edilib.
Konfrans işini 21 bölmədə 5 mövzu üzrə davam etdirib. Coğrafi İnformasiya sistemləri və kartoqrafiya, 2D-3D-4D GIS, məkan məlumatlarının yaradılması, mobil xəritəçəkmə, ağıllı şəhərlər və ağıllı kənd təsərrüfatı üçün məkan tətbiqləri, bina məlumat modelləşdirilməsi, fotoqrammetriya və uzaqdan zondlama, INSPIRE, LPIS, TUCBS və s. mövzularında ingilis dilində məruzələr dinlənilib, fikir mübadiləsi və müzakirələr aparılıb.
Konfrans geomatika mütəxəssisləri, eləcə də coğrafi məkanı öyrənən digər alim və mütəxəssislər üçün geniş didaktik və əməkdaşlıq imkanları verəcək.
Bölmənin digər xəbərləri
