“Vışeqrad dördlüyü” ailələrə dəstək göstərməyi hədəf seçib
Budapeşt, 31 may, AZƏRTAC
“Vışeqrad dördlüyü” ölkələrinin formalaşdırdıqları yeni birgə proqram ailələrin dəstəklənməsinə və doğum sayının stimullaşdırılmasına istiqamətlənib.
AZƏRTAC xəbər verir ki, V4 blokuna üzv olan ölkələrin - Macarıstan, Çex Respublikası, Polşa və Slovakiyanın ailə məsələləri üzrə nazirləri bu gün keçirilmiş videokonfransda ailə dəyərlərinin dəstəklənməsi barədə birgə bəyannamə qəbul ediblər.
Bəyannamə demoqrafiya problemlərinə miqrasiya yolu ilə deyil, ailələrin dəstəklənməsi və doğum sayının stimullaşdırılması vasitəsilə cavab tapmağa istiqamətlənib. Nazirlər ailələrə aid siyasi tədbirləri müzakirə etmək və birgə tədqiqatlara başlamaq barədə razılığa gəliblər.
V4 ölkələrinin məqsədi gənc ailələrin arzu etdikləri sayda uşaq dünyaya gətirmələri, maddi problemlər ucbatından sıxıntı yaşamamaları üçün şəraiti təmin etməkdir.
Pərvanə Qarayeva
AZƏRTAC-ın xüsusi müxbiri
Budapeşt
Bölmənin digər xəbərləri
