Vyanada əmək miqrantlarına abidə ucaldılacaq
Vyana, 10 aprel, AZƏRTAC
Vyana şəhərində əmək miqrantlarına (qastarbayter) abidə ucaldılacaq.
AZƏRTAC xəbər verir ki, illərdən bəri abidənin ucaldılmasına çalışan təşəbbüs qrupu artıq maliyyələşmə və yerlə bağlı rəsmi qurumların icazəsini alıb.
Təşəbbüs qrupunun rəhbəri Savo Ristiç bildirib ki, abidə Vyana Mərkəzi Vağzalının arxasındakı meydanda ucaldılacaq. Yerin seçilməsi də simvolik xarakter daşıyır, belə ki, 1961-ci ildə Avstriyada ilk qastarbaytarlər məhz bu ərazidə yerləşən Cənub Vağzalında qarşılanmışlar və illər uzunu şəhərdəki qastarbayterlər öz həmvətənləri ilə görüşmək, vətənə gedib-gələnlərdən xəbər almaq, mənzil və iş axtarmaq üçün vağzalın yanındakı meydanda toplaşarmışlar. S. Ristiç bildirib ki, bəzən sadəcə vətən həsrəti miqrantları bu meydana gəlməyə, soydaşları ilə hal-əhval tutmağa sövq etmişdir. Həmin meydandakı abidə keşməkeşli həyat yaşamış ilk nəsil miqrantların xatirəsini yaşatmağa, onların həyat hekayəsini anlatmağa xidmət edəcəkdir.
Büdcəsi 330 min avro təşkil edən layihənin reallaşdırılması üçün yaxın müddətdə incəsənət xadimləri arasında müsabiqə elan ediləcəkdir.
Qeyd edilməlidir ki, Almaniyanın timsalında Avstriyada da ötən əsrin 60-cı illərində ölkəyə əcnəbi işçi qüvvələrin (qastarbayterlər) dəvət olunmasına başlanmışdır. İkinci Dünya müharibəsindən sonra bir çox Avropa ölkələrində olduğu kimi Avstriyada da əmək bazarında işçi qıtlığı hökm sürürdü. Xüsusilə də 50-ci illərdən etibarən başlayan iqtisadi yüksəliş dövründə yeni işçi qüvvələrinə tələbat artmışdı.
Almaniya nümunəsi əsasında müxtəlif ölkələrdə fəaliyyət göstərən bürolar xüsusi hazırlanmış sistem əsasında işçi qüvvələri seçirdi. Əsasən kişilərdən ibarət olan işçilər məhdud müddət üçün Avstriyada işləməli, onların ailələri öz ölkələrində qalmalı və rotasiya prinsipi əsasında müəyyən müddətdən sonra yeni işçi qüvvələri ilə əvəz edilməli idi.
Avstriyaya əmək miqrasiyasının ilk dövrləri uğursuzluqla müşayiət olunmuşdur. Belə ki, İspaniya və İtaliyadan olan əmək miqrantları daha yaxşı maaş verilən Almaniya və İsveçrəyə üz tuturdular. Yalnız 1963-cü ildən başlayaraq Türkiyə, daha sonra isə Yuqoslaviya və Yunanıstandan işçilər Avstriyaya cəlb oluna bildilər. Saziş müəllifləri 47 min əmək miqrantına ehtiyac olduğunu bildirsələr də, on il sonra ölkədə artıq 230 min əcnəbi işçi qeydiyyatda idi. Hazırda Avstriya əhalisinin təxminən 10 faizi (800 mindən çox insan) miqrant əsilli insanlardan təşkil olunur.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
