Xaçmazda fizika fənnini tədris edən ana və qızı sertifikatlaşdırma imtahanında yüksək bal toplayıb
Xaçmaz, 25 iyun, Elxan Yusifli, AZƏRTAC
Bu gün keçirilən təhsilverənlərin sertifikatlaşdırılması prosesinin test imtahanı mərhələsində fizika fənnini tədris edən ana və qızı yüksək nəticə əldə edib.
AZƏRTAC-ın bölgə müxbiri xəbər verir ki, informatika fənni üzrə Xaçmaz rayonu üzrə ən yüksək nəticəni şəhər 4 nömrəli tam orta ümumtəhsil məktəbinin müəllimi Xanım Məmmədəliyeva qazanıb. X.Məmmədəliyeva imtahandan 58 bal toplayıb.
Onun anası Xaçmaz şəhər Cəfər Cabbarlı adına 6 nömrəli tam orta ümumtəhsil məktəbinin fizika müəllimi Nailə Arzumanova da imtahanda 55 bal yığaraq yüksək nəticə göstərib.
İyunun 18-dən başlayan sertifikatlaşdırmanın test imtahanı mərhələsinə Quba-Xaçmaz Regional Təhsil İdarəsinin tabeliyində fəaliyyət göstərən ümumi təhsil müəssisələrindən 1006 nəfər müəllimi cəlb olunub.
Qeyd edək ki, sertifikatlaşdırmanın məqsədi təhsilverənlərin peşəkarlıq səviyyəsinin və peşə yararlığının yoxlanılması prosedurunu tənzimləməkdən ibarətdir.
Bölmənin digər xəbərləri
