“Xəstəlik əlamətlərini internetdə axtarmaqdansa, həkimə müraciət etməyi məsləhət görərdim” - MÜSAHİBƏ
Bakı, 31 oktyabr, Aytac Haqverdiyeva, AZƏRTAC
Azərbaycan gəncləri hər zaman ölkə xaricində də uğurlu addımlar atıb, bilik və bacarıqları ilə seçilib, Vətənimizi layiqincə təmsil ediblər. Onları tanımaq, həmçinin gənc nəslə tanıtmaq isə vacib məsələlərdəndir. Çünki öz iradəsi, əzmkarlığı, çalışqanlığı və biliyi ilə seçilən bu insanlar yetişməkdə olan nəslin həyat yoluna düzgün istiqamət verə bilərlər. Belə istedadlı gənclərdən biri də həkim Samir Zeynalovdur.
Almaniyanın “Helios Kliniken Kassel” xəstəxanasının qastroenterologiya ixtisası üzrə mütəxəssisi Samir Zeynalov AZƏRTAC-ın suallarını cavablandırıb.
-Salam Samir həkim, Vətəndən uzaqda olsanız da, müasir texnologiyalar sayəsində bu məsafələr qısalır. Elə bugünkü onlayn görüşümüz kimi... Zəhmət olmasa, özünüz barədə məlumat verəsiniz?
-Mən 1985-ci ildə Moskvada dünyaya gəlmişəm. Ailəm atamın işi ilə bağlı bir neçə il Moskvada yaşayıb. Daha sonra Bakıya köçmüşük və uşaqlıq illərim orada keçib. Orta məktəbi və ali təhsilimi də Bakıda bitirmişəm. 2003-2009-cu illərdə Azərbaycan Tibb Universitetinin (ATU) müalicə-profilaktika fakültəsində oxumuşam, internatura proqramı isə Sumqayıt şəhərinin 1 nömrəli xəstəxanasında kardiologiya ixtisası üzrə olub.
- Bəs, necə oldu ki, bu sahəni seçdiniz? Yəni, həkimliyə maraq haradan yarandı?
- Bu peşəyə maraq məndə uşaqlıqdan yaranıb. Məktəbdə oxuyanda hər zaman təbiət elmlərinə maraq göstərdiyimi xatırlayıram. Çalışırdım ki, bu sahədə daha yaxşı olum. Təhsildə bir müddət sonra dərslər bölünür. O zamanlar belə dəqiq elmlərə xüsusi həvəsli idim: kimya, biologiya, anatomiya, coğrafiya və xüsusilə riyaziyyat... Dərslərdə keçirilən praktiki məşqləri, eksperimentləri, kitablardakı mövzuları hər dəfə sınamağa çalışırdım. Elə həmin yaşlarımda tibb sahəsini özümə hədəf kimi qoymuşdum. Məktəb vaxtı ən çox zaman keçirdiyim riyaziyyat fənni olub. Hər gün müəllimin verdiyi tapşırıqlardan iki-üç mövzu əlavə edirdim. Hətta məktəbli olarkən həkimlərlə bağlı jurnallar, kitablar oxuyurdum. Mənim oxuduğum illərdə təəssüf ki, internet kimi geniş imkanlar yox idi. Həmin dövrlər yeni məlumatların əldə edilməsi olduqca çətin və vaxt aparan iş idi. Telekanallarda verilən tibbi verilişlərə baxaraq, ixtisasın müxtəlif sahələri ilə maraqlanırdım.
Universitetdə oxuduğum dövrdə qarşıma hər hansı ixtisası hədəf kimi seçmədim. Hətta bütün sahələrdə peşəkarlaşmaq arzusunda idim. Etiraf edim, sonradan daxili xəstəliklərin müalicəsi sahəsinə marağım daha çox olub. Bilirsiniz, cərrahiyyə sahəsində əsas praktiki məşğuliyyətdir. Xəstəlik vaxtı göstərilən tibbi müdaxilələr, əməliyyatlar daha çox əl qabiliyyəti tələb edir. Mənim də bununla bağlı bildiyim metodlar kifayət qədər idi. Daxili xəstəliklər üzrə mütəxəssis-həkimlər pasiyentlə ilk kontaktda olan insanlardır. Dünya praktikasında dəfələrlə sübut edilib ki, xəstənin ilk müraciəti məhz daxili xəstəliklər üzrə mütəxəssis və ya ailə həkiminə olur.
Daxili xəstəlikləri öyrəndikdən sonra məndə kardiologiyaya maraq yarandı. Bu səbəbdən internaturanı proqramını məhz kardiologiya şöbəsində bitirdim. Daha sonra hərbi xidmətə yollandım və xidmətdən geri döndükdə alman dilini öyrənməyə başladım. Xatırlayıram ki, həmin dövrlər Azərbaycan Təhsil Nazirliyinin Almaniyada təhsillə bağlı bir sıra proqramları var idi. Ancaq həmin proqramlarda alman dilini bilmək vacib məqamdır. 2011-ci ildə alman dilini öyrənməyi yekunlaşdırsam da, həmin proqramların müraciət vaxtı bitmişdi. Lakin bu, məni qarşıma qoyduğum məqsəddən uzaqlaşdırmadı. Özüm müraciət etməyə başladım. Bir il müddətində mənə cavab məktubları gəldi və həmin bir il ərzində mən alman dilini təkmilləşdirdim. Müraciətlərin pozitiv cavabı gəldikdə isə Almaniyaya gəldim və o zamandan burada həkim kimi fəaliyyət göstərirəm. Hazırda əsas məqsədim qastroenterologiyanı daha dərindən öyrənmək və müalicə metodlarını inkişaf etdirməkdir.
-Yəqin ki, Almaniyada sizə müraciət edən azərbaycanlı pasiyentləriniz də olur...
-Bəli, kifayət qədər həmyerli pasiyentim var. Düzünü desəm, azərbaycanlı soydaşlarım hər hansı bir xəstəliklə bağlı mənə güvənib müraciət edəndə, qürur hissi duyuram. Çünki onlar mənə etibar edir, digər əyalətlərdən, hətta Avropanın başqa ölkələrindən müalicə üçün gəlirlər. Hər zaman çalışıram mənə müraciət edən xəstələr razı qalsınlar.
- Pasiyentlərinizə nə məsləhət görürsünüz?
-Bəzən pasiyentlər xəstəliklərinin əlamətlərini internetdə araşdırırlar. Ancaq bu, müəyyən mənada düzgün deyil. Çünki xəstəliklərin ortaq əlamətləri çox olur. Məsələn, mədə-bağırsaq xəstəliklərinin bir çoxu xroniki formada keçir. Bunlar hətta oynaq və dəri problemləri yarada bilir. Xəstə bunu oynağında hər hansı bir ağrı və ya dəridə səpki kimi qiymətləndirir. İnternetdə araşdırdığı da məhz bu mövzu olur. Nəticədə isə müəyyən ağırlaşmalar yaşana bilər. Bu səbəbdən məsləhət görərdim ki, bədənin hər hansı bir nahiyəsində və ya orqanında ağrı hiss etdikdə ilk olaraq mütəxəssisə, yəni həkimə müraciət edəsiniz. Bütün xəstəliklərin ilkin kompleks müayinəsinə ehtiyacı var. Bu, mənim də tətbiq etdiyim bir metoddur.
Mədə-bağırsaq xəstəliklərindən əziyyət çəkən şəxslərə və ya bu problemlərdən qorunmaq istəyənlərə ilk məsləhətim odur ki, qəbul etdikləri qidalara və qida rejiminə ciddi riayət etsinlər. Bütün həkimlərin ilkin məsləhəti zərərli vərdişləri tərgitməkdir. Bəzən pasiyentlər düşünürlər ki, “mən artıq tütün məhsulundan istifadə etmirəm, ancaq heç bir fərq yoxdur”. Bütün zərərli vərdişlərdən uzaq durmağın effekti bir müddət sonra hiss olunur.
-Son olaraq, ATU-da təhsil alan gələcəyin həkimlərinə hər hansı sözünüz varmı?
-Mənim gələcək həkimlərə tövsiyəm ondan ibarətdir ki, çoxlu əlavə məlumat əldə etsinlər, oxusunlar. Çünki həkim gərək daim öz üzərində çalışsın. Öyrəndikləri informasiyanı bir neçə mənbədən oxusunlar və praktiki tətbiq etməyə çalışsınlar. Bundan əlavə, sırf bir sahə üzrə hədəf seçməyin və özünüzü tibbin bütün sahələrində inkişaf etdirməyə, paralel olaraq öz ixtisasınızı da dərindən yiyələnməyə çalışın.
Bölmənin digər xəbərləri
