SİYASƏT
Yaltada əfsanəvi müğənni Müslüm Maqomayevin xatirəsinə həsr edilmiş konsert olmuşdur
Bakı, 27 avqust (AZƏRTAC). Ukraynanın yay istirahət mərkəzində - populyar Yalta kurort şəhərində böyük müğənni və musiqiçi Müslüm Maqomayevin xatirəsinə həsr edilmiş konsert olmuşdur. Bu barədə AZƏRTAC-a Krımın Azərbaycan icmasının başçısı Rəhim Hümbətov məlumat vermişdir.
Beynəlxalq səviyyəli tədbirlərin keçirildiyi A.P.Çexov adına teatrın səhnəsində populyar şou-biznes ulduzları çıxış etmiş, Azərbaycanın əfsanəvi müğənnisi Müslüm Maqomayevin repertuarından mahnılar səslənmişdir. Aparıcı çıxışlararası fasilələrdə onun tərcümeyi-halından maraqlı faktlar da danışmışdır. Səhnədə M.Maqomayevin böyük portreti qoyulmuşdu.
Rusiya Dövlət Akademik Böyük Teatrının solistləri Yuri Zaytsman, Sergey Plyusnin və başqalarının ifasında mahnılar səslənmişdir.
Konsertin təşkilatçılarının - “Dünya istedadları” fondu kollektivinin fikrincə, bu, böyük artist və musiqiçinin xatirəsinə və istedadına olan ehtiramı nümayiş etdirir.
Azərbaycan icması adından Rəhim Hümbətov gözəl gecəyə görə artistlərə minnətdarlığını bildirərək demişdir: “Tamaşaçılar artistləri çox hərarətlə qarşılamışlar, böyük Müslüm Maqomayevin repertuarından mahnıları məmnuniyyətlə ifa etmiş müğənniləri fasiləsiz alqışlarla səhnəyə geri çağıraraq onun yaradıcılığına bir daha müraciət etmək imkanı yaratmışlar”.