YARDIMÇI ELEKTRİK STANSİYALARINDA BAŞ VERMİŞ QƏZALAR ARADAN QALDIRILMIŞDIR
Dekabrın 21-də “Sumqayıt-2” və Zabrat yardımçı elektrik stansiyaları qısaqapanma nəticəsində enerji sistemindən müvəqqəti olaraq ayrılmışdı.
AZƏRTAC ölkənin baş energetika idarəsinin mətbuat xidmətinə istinadən xəbər verir ki, Zabratdakı 40 meqavatlıq yardımçı elektrik stansiyasında transformatorlardan biri həddən artıq yükləndiyinə görə sıradan çıxmışdı. “Azərenerji” Açıq Səhmdar Cəmiyyətinin mütəxəssisləri qəzanın nəticələrini aradan qaldırmaq üçün operativ texniki və təşkilati tədbirlər görmüşlər. Sıradan çıxmış transformator qısa müddətdə sistemdən ayrılmış, qalan transformatorların iş rejimi bərpa olunmuş, istehlakçılar yenidən elektrik enerjisi almışlar.
Sıradan çıxmış transformator yaxın günlərdə yenisi ilə əvəz olunacaqdır.
110 kilovatlıq “Sumqayıt-2” yardımçı elektrik stansiyasında qəza isə ətrafdakı qanunsuz tikililərdən kanalizasiya suyunun və güçlü yağışlar nəticəsində sel sularının yardımçı stansiya istiqamətinə axıdılması nəticəsində baş vermişdir. Belə ki, kabel tunelini su başmış və qısa qapanma baş vermişdir. Burada da qəzanın nəticələri operativ surətdə aradan qaldırılmışdır.
Bölmənin digər xəbərləri
