Yay məktəbində 60-dək tələbə tullantıların idarəolunması ilə bağlı biliklərə yiyələnmişdir
Bakı, 10 iyul (AZƏRTAC). “Təmiz Şəhər” Açıq Səhmdar Cəmiyyətinin (ASC) Şəki şəhərində təşkil etdiyi III tələbə yay məktəbi başa çatmışdır.
ASC-nin mətbuat xidmətindən AZƏRTAC-a bildirmişlər ki, tələbə yay məktəbi Heydər Əliyev Fondunun vitse-prezidenti Leyla xanım Əliyevanın təşəbbüsü ilə reallaşdırılan IDEA Beynəlxalq Ətraf Mühit Kampaniyası (International Dialogue for Environmental Action) ilə birgə təşkil edilmişdir. Yay məktəbinin məqsədi gənclər arasında “yaşıl düşüncə” tərzini formalaşdırmaq, ekologiyanın qorunmasında onların fəal iştirakını təmin etməkdir.
Yay məktəbində iştirak edən 60-dək tələbə tullantıların idarəolunması prosesi və zərərsizləşdirilməsi üsulları haqqında biliklərə yiyələnmişdir. Gənclərə, həmçinin “Təmiz Şəhər” ASC-nin mütəxəssisləri ölkəmizdə tullantıların idarəolunması sahəsində görülən işlər və planlaşdırılmış layihələr haqqında məlumat vermişlər.
Eyni zamanda, məktəb iştirakçıları üçün iqtisadi və ekoloji təhlükəsizlik, alış-verişin ətraf mühitə təsiri və digər mövzulara dair debat turnirləri, müxtəlif idman və intellektual oyunlar, viktorinalar keçirilmişdir. Tələbələr “yaşıl düşüncə” konsepsiyasını əyani göstərərək yalnız təkrar emal olunmuş materiallardan hazırlanmış bloknot və qələmlərdən istifadə etmişlər.
Yay məktəbi “Vətəndaş Cəmiyyətində Debat” İctimai Birliyinin təşkilati dəstəyi ilə həyata keçirilir.
Bölmənin digər xəbərləri
