Yekaterinburqda azərbaycanlıların öldürülməsi Rusiyanın qeyri-rus xalqlarına qarşı real münasibətidir - ŞƏRH
Bakı, 28 iyun, AZƏRTAC
Rusiyanın Federal Təhlükəsizlik Xidmətinin Yekaterinburq şəhərində azərbaycanlıların yaşadığı evlərə basqını nəticəsində həmvətənlərimizin həlak olması və bəzilərinin ağır bədən xəsarətləri nəticəsində yaralanması, habelə 9 nəfərin saxlanılması bir daha "velikorus" şovinizminin, rus millətçiliyinin bariz nümunəsi oldu. Bu yalnız azərbaycanlılara qarşı etnik zəmində törədilən cinayət deyil, eyni zamanda, Kremlin Rusiyanın qeyri-rus xalqlarına qarşı real münasibəti və siyasətidir.
Bu hadisə ciddi-cəhdlə maskalanan rus faşizminin əsl simasını göstərməsidir. XXI əsrdə bütün dünya buna raşizm deyir.
Bu sözləri AZƏRTAC-a açıqlamasında “Prioritet” Sosial İqtisadi Araşdırmalar Mərkəzi İctimai Birliyinin sədri Zaur İbrahimli söyləyib.
O əlavə edib ki, bu ideologiyanın kökündə digər xalqlara alçaldıcı diskriminasiya münasibəti durur. Rus şovinizminin əsas ideoloji postulatı türklərə və ələlxüsus Azərbaycana qarşı düşmənçilik təşkil edir. Biz bunu 1990-cı il 20 Yanvar hadisələrində, Xocalı soyqırımında görmüşük. Bunu işğalçı Ermənistana himayədarlıqdan bilirik. Yekaterinburq şəhərində azərbaycanlılara qarşı etnik zəmində terror bu siyasətin daha bir təzahürüdür. "Unutmayaq ki, Rusiya hələ də bu ölkə ərazisində AZAL-a məxsus mülki təyyarənin vurulmasına görə üzr istəməyib, məsuliyyətdən yayınmağa çalışır. Bu siyasət bilavasitə və birbaşa Kremldən həyata keçirilir, bu siyasətə Prezident Vladimir Putinin mövqeyi, yanaşması rəvac verir. Raşizm məhz Kremlin ideologiyasıdır. Bu ideologiya ruslara qardaş olan Ukrayna xalqını belə qırğına verir. Təsadüfi deyil ki, Ukraynada Putini alman faşizmin lideri Hitlerlə müqayisə edir və Putler adlandırırlar...
Raşizm Rusiyadakı qeyri-rus millətləri Ukrayna ilə müharibədə kütləvi qırğına verir, rusları isə cəbhəyə aparmır. Bu siyasət tezliklə Putin imperiyasını parçalayacaq və ilk növbədə, rus xalqının özünə böyük təhlükədir. Raşizm başqa xalqlara diskriminasiyanı, istismarı rəva bilir. Məşhur publisist və jurnalist Nevrozov yazır ki, patriotizm, şovinizm, imperializm rus xalqı üçün hər şey əvəz edən alkoqol kimidir. Bu ideologiya Prezident Putinin səyləri ilə artıq zəhərləyici, yoluxucu mahiyyət alıb, epidemiyaya çevrilib. Bu epidemiya elə rus cəmiyyətini məhv edəcək. Necə ki, qəhvəyi vəba Almaniyaya və dünyaya faciələr yaşatdı. İndi raşizm bu yolu tutub...
Buna, ilk növbədə, rus xalqı etiraz etməli, putlerizmə qarşı çıxmalıdır.
Yekaterinburq şəhərində azərbaycanlıların yaşadığı evlərə basqın, etnik zəmində terrora qarşı Azərbaycan cəmiyyəti qəti şəkildə etiraz edir, bu cinayətə göstəriş verənləri lənətləyir. Azərbaycan vətəndaş cəmiyyəti qətiyyətlə soydaşlarımıza qarşı bu terroru pisləyir, çünki bu, insanlıq əleyhinə cinayətdir. Əgər Rusiya rəhbərliyi etnik zəmində terroru dəstəkləmirsə, üzr istəməli, dərhal günahkarlar cəzalandırılmalıdır",- deyə QHT sədri vurğulayıb.
Bölmənin digər xəbərləri
