“Yıldız Çocuklar” layihəsinin final mərhələsində 40-a yaxın uşaq bacarıqlarını nümayiş etdirib VİDEO
Bakı, 25 fevral, Göyçək Mahmudlu, AZƏRTAC
Fevralın 25-də Türkiyə Yerel Basın Birliyinin (TYBB) “İktidar” qəzetinin və “Mirtalıblı Group” şirkətinin təşkilatçılığı ilə həyata keçirilən “Yıldız Çocuklar” layihəsinin final mərhələsi keçirilib.
AZƏRTAC xəbər verir ki, tədbirdə çıxış edən Türkiyə Yerel Basın Birliyinin “İktidar” qəzetinin Azərbaycan təmsilçisi Həsən Məmmədov TYBB olaraq dünyanın bir çox yerlərində böyük layihələrə imza atdıqlarını, Azərbaycanda ilk layihələrinin ötən il keçirilən “Başarı ödülləri” olduğunu bildirib. O deyib: “Həmin layihə həm Azərbaycan, həm də Türkiyədə səs-küyə səbəb oldu. “Başarı ödülləri” və “Yıldız Çocuklar” layihələrinin şüarı “Bir millət, iki dövlət”dir. Azərbaycan ilə Türkiyə arasında qardaşlıq əlaqələrinin daha da möhkəmləndirilməsi üçün həmin şüar altında tədbirlərimizi bundan sonra da davam etdirəcəyik.
“Yıldız Çoçuklar” layihəsinin keçirilməsində məqsəd istedadlı uşaqların üzə çıxarılması, onların həvəsləndirilməsi, beynəlxalq arenada Azərbaycanı təmsil etmələrinə şəraitin yaradılmasıdır. Həmin layihədən dünya səhnələrinə çıxan uşaqlar da var.
Layihədə 40-a yaxın uşaq iştirak edir ki, onlardan 10-u şəhid övladlarıdır. Onların layihəmizdə yer almaları bizim üçün həm qürurvericidir, həm də böyük əhəmiyyət kəsb edir”.
“Mirtalıblı Group” şirkətinin rəhbəri Ləman Mirtalıblı iki aya yaxın davam edən layihədə 2 yaşdan 16 yaşadək uşaqların iştirak etdiklərini bildirib.
“Uşaqlarla işləmək bizə o qədər xoş ovqat bəxş etdi ki, layihənin ikinci hissəsini də həyata keçirməyi düşünürük”, - deyə L.Mirtalıblı diqqətə çatdırıb.
Sonra Əməkdar artist Gülüstan Əliyeva şəhid övladlarından ibarət “Zəfər sədası” uşaq xoru ilə birgə musiqisi bəstəkar Vüqar Camalzadəyə, sözləri Aydın Ucala aid olan “Ey Vətən” mahnısını ifa edib.
AZƏRTAC-ın müxbiri ilə fikirlərini bölüşən tədbirin münsiflərindən biri, Əməkdar artist Gülüstan Əliyeva deyib: “Şəhid övladları bizim baş tacımızdır. Hər birimiz öz sahəmizdə onlar üçün əlimizdən gələni etməyə çalışırıq. Mən də şəhid ailəsi üzvü olaraq qəhrəmanlarımızın yadigarları ilə birgə vətənpərvərlik mövzusunda mahnı ərsəyə gətirmək istədim. Ümumiyyətlə, yetişməkdə olan nəslə vətənpərvərlik ruhunun aşılanması hər birimizin ümdə borcudur. Mahnının klipi də ərsəyə gəldi. Düşünürəm ki, bu, şəhid övladlarının yaradıcılığında irəliyə doğru bir addım oldu. Onlar üçün nəsə edə bildiyim üçün şadam”.
Daha sonra uşaqlar müxtəlif istiqamətlərdə öz bacarıqlarını, rəsm əsərləri, əl işləri və moda nümayiş etdirib, rəqslər, musiqilər ifa edib, şeirlər söyləyiblər. Həmçinin Gəncə Dövlət Filarmoniyasından gələn uşaqların çıxışına da yer verilib.
Tədbirin sonunda uşaqların hər biri fərqli kateqoriyalarda təltif olunub.
Bölmənin digər xəbərləri
