Cəbhədə 400-dən çox hərbçisi olan Çaylı kəndi - REPORTAJ VİDEO
Biləsuvar, 9 noyabr, İsmayıl Cəfərli, AZƏRTAC
Bu gün döyüş meydanında düşmən ordusunun təxribatlarına layiqincə cavab verən Azərbaycan əsgəri torpaqlarımızı işğaldan azad edərək bizə yeni zəfərlər bəxş edir. İgidlərimizin canı və qanı bahasına əldə olunan bu zəfərlərdə biləsuvarlı Vətən oğullarının da payı az deyil. Mübarizlər yetişdirən diyardan minlərlə oğul ön cəbhədə düşmənə qan uddurur.
AZƏRTAC xəbər verir ki, 2000 nəfərdən artıq əhalisi olan Biləsuvarın Çaylı kəndindən hazırda Azərbaycan Ordusunda 450 nəfərə yaxın əsgər, gizir və zabit xidmət edir. Kənd sakinlərinin sözlərinə görə, bəzi ailələrdən hətta 3 qardaş ön cəbhədə düşmənlə haqq savaşındadır.
Düşmənə sarsıdıcı zərbələr endirməklə, onların zirehli texnikalarını, silah-sursatlarını hər gün qənimət kimi əldə edən belə qəhrəman oğullardan biri də kənd sakini tankçı Əfsun Astanovdur. Ailədə 3 hərbçidən ən kiçiyi olan Əfsun hazırda ön cəbhədə vuruşur. Döyüş əməliyyatlarında göstərdiyi şücaəti, qəhrəmanlığı ilə komandirlərinin böyük etimadını qazanan Əfsun ordumuzun əldə etdiyi parlaq qələbələrdə payı az deyil. Oktyabrın 23-də xidmətlərinə görə komandanlıq tərəfindən aldığı yüksək mükafat ailə üzvlərinin də böyük sevincinə səbəb olub. Qardaşı hərbçi Əfqan Astanov deyir ki, biz Əfsunun Xocalıda, Kəlbəcərdə də zəfərlər qazanacağına inanırıq: “Qardaşım Vətən müharibəsində gedən döyüşlərdə düşmən qənimətlərinin ələ keçirilməsində fəal iştirak edib. Mənfur düşmənin 17-yə yaxın texnikasını ələ keçirib. O, komandanlıq tərəfindən Azərbaycanın Milli Qəhrəmanı Albert Aqarunovun adını daşıyan medalla təltif olunub”.
Həyəcanla hər gün ekran qarşısında əyləşib ordumuzun qazandığı zəfərləri izləyərək qürurlanan balaca Nərmin Astanlı da atasının və əmilərinin bu igidliyi ilə qürur duyur. “Atamı çox istəyirəm, bizdən ötrü darıxmasın. Hər gün onun üçün, bütün əsgərlərimiz üçün dualar edirik. İnşallah, evimizə qələbə ilə qayıdar”, - deyə o vurğulayıb.
Çaylı kəndində daha bir hərbçi ailəsi olan Axundovlar da ötən gün Şuşanın işğaldan azad olunmasını bayram ediblər. Əli Axundovun iki oğlu 10 ilə yaxındır ki, Silahlı Qüvvələrin xüsusi təyinatlısıdır. Deyir ki, dünən Ali Baş Komandanın Şuşanın azad olunması münasibətilə xalqımızı təbrik etməsi onları da sevinc göz yaşlarına qərq edib. Əli kişi deyib: “Var olsun, Şanlı Ordumuz! Var olsun, Ali Baş Komandanımız. 8 mayı tarixdən silib, 8 noyabrla əvəz etdi. Düşmənə bir daha diplomatik və hərb yolla zərbəsini vurdu. Hər iki oğlum bu gün cəbhədədir. Mən də hazıram, əlimdə silah onlarla döyüşə gedib düşməni məhv etmək istəyirəm”.
İndi Çaylı kəndi kimi, ölkəmizin bütün şəhər, rayon, qəsəbə və kəndlərindən olan yüzlərlə igidlərimiz döyüş meydanında düşmənə sarsıdıcı zərbələr endirir. Hər kəs Ali Baş Komandanın verdiyi döyüş əmrini canla-başla yerinə yetirib, işğalçı düşməndən torpaqlarımızı azad edir. İndi hər bir vətəndaşın ürəyi cəbhədə, Azərbaycan əsgərinin yanında döyünür.
Bölmənin digər xəbərləri
