Kiyevdə Ukrayna dilinə tərcümə olunmuş “Xocalı: Soyqırımının xronikası” kitabının təqdimatı olub VİDEO
Kiyev, 24 fevral, AZƏRTAC
Kiyev şəhərində Ukrayna dilinə tərcümə olunmuş “Xocalı: Soyqırımının xronikası” adlı kitabın təqdimatı keçirilib.
AZƏRTAC xəbər verir ki, Azərbaycanın Ukraynadakı səfirliyinin təşkilatçılığı və təşəbbüsü ilə çap edilən, Ukrayna Azərbaycanlıları Radasının binasında keçirilən təqdimat mərasimində səfir Elmira Axundova, diplomatlar, diaspor rəhbərləri, Ukraynanın elm xadimləri, Ukrayna Müdafiə Nazirliyinin nümayəndələri, yerli KİV-lərin təmsilçiləri iştirak ediblər.
Səfir Elmira Axundova çıxış edərək bildirib ki, bu gün “Xocalıya ədalət!” kampaniyası çərçivəsində Xocalı soyqırımının dünyada tanıdılması istiqamətində mühüm işlər görülür. Bu kitabın Ukrayna dilində nəşri də həmin kampaniya çərçivəsində görülən işlərin tərkib hissəsidir. “Hesab edirəm ki, bu kitab Ukrayna cəmiyyətində Xocalı soyqırımı haqqında real mənzərə yarada biləcək. Ukraynalılar Xocalı soyqırımı haqqında yazılan məqalələr, poemalar, əsərlər vasitəsilə Ermənistanın Azərbaycanın mülki şəxslərinə qarşı necə amansız, insanlıq əleyhinə cinayət törətdiyinin şahidi olacaqlar. Çünki Xocalıda baş verənlər təkcə Azərbaycan xalqına qarşı soyqırımı deyil, bəşəriyyət, insanlıq əleyhinə törədilmiş qanlı cinayətdir”, - deyə səfir əlavə edib.
Səfir vurğulayıb ki, yalan və saxtakarlıq üzərində qurulmuş erməni təbliğat maşınının iç üzü artıq ifşa olunub. Dünya ictimaiyyəti Xocalı həqiqətlərini qəbul edir, Xocalı faciəsinin soyqırımı olması faktı dünyanın bir çox ölkələrinin və beynəlxalq təşkilatların qərarlarında, qətnamələrində əksini tapır.
Sonra tədbirdə çıxış edən Ukrayna Azərbaycanlıları Radasının həmsədrləri Hikmət Cavadov, Oleq Krapivin, kitabın nəşriyyatının müdiri Dmitri Buraqo, tanınmış ukraynalı alimləri Oleq Kupçik və professor Fərhad Turanlı, kitabın tərcüməçisi Mehman Salmanov, Azərbaycan Silahlı Qüvvələrinin Ukraynadakı hərbi attaşesi polkovnik İlqar Ağayev, səfirliyin müşaviri Vüsal Süleymanov və soydaşlarımız Şeyx Şakir Yəhyayev, Vidadi İsrafilov kitabın əhəmiyyətindən danışıblar. Qeyd ediblər ki, kitab Xocalı soyqırımından bir il sonra - 1993-cü ildə çap olunub. Bu müddətdə faciə ilə bağlı xarici və yerli KİV-lərdə dərc olunan məqalələr, şahidlərin ifadələri, soyqırımının törədilməsində iştirak edən 366-cı motoatıcı alayın bəzi hərbi qulluqçularının etirafları, Xocalı soyqırımına dair qaldırılan cinayət işinin materialları, qeyri-hökumət təşkilatlarının bəyanatları və digər faktlar kitabda öz əksini tapıb. Çıxışçılar vurğulayıblar ki, alimlər, tarixçilər bu faktlar vasitəsilə Xocalı faciəsini dərindən araşdıra biləcəklər.
Kitabın emosional təsirini daha da artırmaq üçün Azərbaycanın tanınmış şairi mərhum Nurəngiz Günün məşhur “Xocalı simfoniyası” poeması da tərcümə olunub. “Xocalı simfoniyası” poemasının Ukrayna dilində yazıçı Lesya Mudrak tərəfindən bədii qiraəti tədbir iştirakçılarını qəhərləndirib.
Qeyd edək ki, kitabda Xocalı soyqırımına dair fotomateriallar, həmçinin UNESCO Rəssamlar Federasiyasının üzvü, Avropada Azərbaycan Mədəni Xadimləri Assosiasiyasının sədri, Azərbaycanın Xalq rəssamı Əşrəf Heybətovun soyqırımına dair rəsm əsərləri də yer alıb.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
