2007-Cİ İL 10 OKTYABR TARİXLİ VİLNÜS ENERJİ TƏHLÜKƏSİZLİYİ KONFRANSI
PREZİDENTLƏRİN KOMMUNİKESİ
2007-ci il oktyabr ayının 10-da Azərbaycan Respublikası, Gürcüstan, Litva Respublikası, Polşa Respublikası və Ukraynanın prezidentləri, o cümlədən Qazaxıstan Prezidentinin Xüsusi nümayəndəsi prezidentlərin 2007-ci il may ayının 11-də Krakov şəhərində enerji əməkdaşlığı iclası zamanı, yaradılmış Hökumətlərarası işçi qrupunun fəaliyyətinin nəticələrinə yekun vurmaq məqsədi ilə Vilnüs enerji təhlükəsizliyi konfransında görüşdülər.
Krakov görüşündə iştirakçılar dövlət və şirkətlərin Xəzər dənizi neftinin Avropa və dünya bazarlarına çıxarılması məqsədi ilə dəhlizin yaradılmasına dair layihədə (Odessa-Brodı-Plotsk-Qdansk layihəsi) iştirakını tənzimləyəcək hökumətlərarası sazişin hazırlanmasına başlayaraq, əməkdaşlığın gücləndirilməsi barədə razılığa gəldilər. Prezidentlər həmçinin ümumi enerji layihələri hazırlayacaq konsorsiumun təsis edilməsini dəstəklədilər. Bu konsorsium hər bir ölkənin müvafiq şirkətindən yaradılacaqdır.
Vilnüsdə prezidentlər Hökumətlərarası işçi qrupunun Qdansk və Tbilisidə keçirilən, habelə müvafiq milli şirkətlərin nümayəndələrinin Yuzefov və Batumidə keçirdiyi iclasların nəticələrini alqışladılar. Hökumətlərarası işçi qrupunun işi, habelə müvafiq milli şirkətlərin nümayəndələrinin iclasları Vilnüs enerji təhlükəsizliyi konfransının birinci hissəsinin nəticələri üçün zəmin yaratdı.
Prezidentlər Azərbaycan Respublikası, Gürcüstan, Litva Respublikası, Polşa Respublikası və Ukraynanın müvafiq nazirlərinin xam neft və təbii qaz üçün yeni nəqliyyat dəhlizi yaratmaq məqsədi ilə enerji sektorunda gələcək əməkdaşlığın əsası kimi sazişin imzalamasını alqışladılar.
İclasın iştirakçıları karbohidrogen ehtiyatlarının daşınması üçün dəhlizin hazırlanması məqsədi ilə təsis ediləcək yeni konsorsiumun milli şirkətlərdən təşkil olunması zərurəti barədə mövqelərini bildirdilər. Yeni konsorsiumun - Sarmatiyanın əsas məqsədi Azərbaycan Respublikası, Gürcüstan, Ukrayna və Polşa Respublikasından keçməklə Xəzər dənizindən Avropa bazarlarına və beynəlxalq bazarlara gedən daşınma sistemlərinin reallaşdırılmasının mümkünlüyünü təhlil etməkdir.
Prezidentlər ölkələr arasında enerji əməkdaşlığının daha da genişləndirilməsinə dair iradələrini bir daha təsdiq edirlər.
Prezidentlər Krakov forumunda iştirak edən ölkələrin növbəti iclasının gələn il Ukraynanın Kiyev şəhərində keçirilməsi barədə razılığa gəldilər.
Azərbaycan Respublikasının Prezidenti zati-aliləri İlham Əliyev
Gürcüstanın Prezidenti zati-aliləri Mixail Saakaşvili
Litva Respublikasının Prezidenti zati-aliləri Valdas Adamkus
Polşa Respublikasının Prezidenti zati-aliləri Lex Kaçinski
Ukraynanın Prezidenti zati-aliləri Viktor Yuşşenko
Qazaxıstan Respublikasının energetika və mineral ehtiyatlar naziri cənab Sauat Mınbayev.
Bölmənin digər xəbərləri
