Şamaxı, 2 iyun, Rəşad Türkoğlu, AZƏRTAC

Xaqani Şirvani, İmadəddin Nəsimi, Seyid Əzim Şirvani, Mirzə Ələkbər Sabir, Abbas Səhhət kimi dahilər yetişdirən Şamaxı türk dövlətlərinin turizm paytaxtı elan edilib. Tarixi və müasirliyi ilə vəhdət təşkil edən qədim şəhər hər zaman bura gələn qonaqların diqqət mərkəzində olub.

AZƏRTAC xəbər verir ki, Azərbaycanın mədəniyyət beşiyi, ədiblər yurdu Şamaxının - türk dövlətlərinin turizm paytaxtı seçilməsi rayonda böyük sevinclə qarşılanıb.

Əslən şamaxılı olan Xalq artisti İlham Namiq Kamal deyir ki, son illər rayonda görülən abadlıq-quruculuq işləri, otel, mehmanxana və digər istirahət mərkəzlərinin istifadəyə verilməsi rayona gələn yerli və xarici qonaqların zövqünü oxşayır.

Azərbaycanda şəhərsalma mədəniyyətinin ən qədim mərkəzlərindən olan Şamaxı şəhəri antik Albaniya dövlətinin iri yaşayış məskənlərindən olub. Əsrlər boyu Şirvanın mühüm mədəni, iqtisadi və siyasi mərkəzi sayılan Şamaxıda turistlərin ziyarət edə biləcəyi xeyli sayda tarixi abidə də mövcuddur. Rayonun Kələxana kəndində yerləşən Kələxana və Yeddi Günbəz türbələr kompleksi, Şaxəndan türbəsi qonaqların üz tutduğu ən qədim abidələrdəndir.

Şəhərdə qədimlik və tarixilik qorunmaqla abadlıq-quruculuq işləri görülür, yeni turizm obyektləri inşa edilir. Paralel olaraq tarixi abidələr restavrasiya olunur. Şəhər sakinlərinin qonaqpərvərliyi, Şamaxının zəngin mətbəx nümunələri də hər zaman bura gələn turistlərin ürəyincə olub.

Regional mədəniyyət idarəsinin Şamaxı üzrə nümayəndəsi Rəfael Tağızadənin sözlərinə görə, rayona üz tutan yerli və xarici qonaqlar burada Şamaxının ləziz mətbəxini, sərin və saf bulaqlarını, əsrarəngiz gözəlliyə sahib olan sıx meşələrini, qədim tarixə malik abidələrini, müasir üslubda inşa edilən istirahət mərkəzlərini görə bilərlər: “Qədim tarixi, yüksək mədəniyyəti ilə hər zaman fəxr etdiyimiz, bir zamanlar Şirvanşahlar dövlətinin paytaxtı olan Şamaxının türk dünyasının turizm paytaxtı seçilməsi hər bir rayon sakini üçün qürurvericidir. Şamaxı hər zaman turistlərin marağında olub. Ümid edirik ki, bu qərardan sonra bölgəmizə üz tutan turistlərin sayında kütləvi şəkildə artım olacaq”.

Şamaxı Turizm İnformasiya Mərkəzinin rəhbəri Taleh Məmmədov bildirib ki, rayon ərazisində 21 mehmanxana və bu tipli obyekt mövcuddur. Onlardan 5-i mehmanxana, 16-sı müxtəlif istirahət mərkəzidir. Bundan əlavə, Şamaxıya gələn qonaqlar kənd turizmindən də yararlana bilərlər. Eyni zamanda, hazırda rayon ərazisində otel, mehmanxana və digər istirahət mərkəzləri tikilməkdədir.

“Şamaxıya gələn qonaqlar istənilən büdcəyə uyğun istirahət növü seçə bilərlər. Rayon ərazisində olan safari parkın, atıcılıq mərkəzinin, müasir otel və istirahət yerlərinin, qədim abidələrin qonaqların zövqünü oxşayacağına əminik”, - deyə o əlavə edib.

Xatırladaq ki, ötən ay Şamaxıda Türk Dövlətləri Təşkilatının turizm nazirlərinin 7-ci iclası və turizm üzrə işçi qrupun 17-ci iclasında Şamaxı şəhəri 2023-cü il üçün türk dünyasının turizm paytaxtı seçilməsi ilə bağlı qərar qəbul olunub.

Şamaxı Qafqaz dağlarının cənub-şərq ətəklərində, dəniz səviyyəsindən 749 metr hündürlükdə yerləşir. Təbii şəraiti, özünəməxsus mülayim iqlimi, mineral bulaqları, uca dağlar qoynundakı palıd, fıstıq və vələs meşələri, gözoxşayan yaşıl çəmənlikləri, tarixi abidələri turistləri özünə cəlb edən əsas amillərdir.