21 rəqəmi onun üçün müqəddəs oldu VİDEO
Masallı, 21 sentyabr, İsmayıl Cəfərli, AZƏRTAC
Tariximizin qürur səhifəsinə adını öz qanı ilə yazan igid oğullarımızdan biri də Sahil Sarıbala oğlu Babayevdir.
AZƏRTAC xəbər verir ki, 2023-cü il sentyabrın 19-dan 20-nə keçən gecə Qarabağda həyata keçirilən antiterror tədbirləri zamanı rəşadətli Ordumuzun sıralarında qəhrəmancasına döyüşən hərbi qulluqçu Sahil Babayevin şəhidlik zirvəsinə ucaldığı gündən bir il keçir. 1992-ci il martın 21-də Masallı rayonunun Ərəb kəndində dünyaya gələn Sahil uşaqlıqdan hərb sənətinə böyük maraq göstərib. Elə buna görə də həqiqi hərbi xidmətini başa vurduqdan sonra bir il keçməyib ki, yenidən ordu sıralarına qayıdıb.
Daxili Qoşunların hərbi qulluqçusu olan Sahil kimi qəhrəmanlar 24 saatdan az müddətdə həyata keçirilən antiterror tədbirləri zamanı rəşadətli Ordumuzun sıralarında dövlət suverenliyimizi tam bərpa edib, işğalçı qüvvələri torpaqlarımızdan qovub, separatizmə son qoyublar.
Sahil Babayev bu döyüşlərdə qəhrəmanlıqla şəhid olub. Anası Aminə Babayeva deyir ki, Sahil iki bacısının arxa-dayağı idi. O, oğlunun Vətən uğrunda şəhid olmasından qürur duyduğunu bildirib: “Mən fəxr edirəm ki, Sahili Vətən üçün böyütdük. Mənim oğlum ölməyib, o, həmişə Azərbaycanla yaşayacaq. “Şəhidlər ölməzdir” deyiblər. Şəhidlər heç vaxt ölməyib və ölməyəcək, daim bizim qəlbimizdə yaşayacaqlar. O şəhidlər ki, onlar ata-analarını, övladlarını yox, Vətəni seçdilər. Vətən uğrunda mübarizə apardılar. Torpaqlarımızı qaytardılar, amma özləri üçrəngli bayrağa bürünərək əbədiyyətə qovuşdular”.
Azərbaycan Respublikasının ərazi bütövlüyünün təmin olunmasında yüksək peşəkarlıq, şücaət və mərdlik göstərmiş, xidməti vəzifələrini və hərbi hissə qarşısında qoyulmuş tapşırıqları yerinə yetirərkən fərqlənmiş Sahil Sarıbala oğlu Babayev ölümündən sonra Ali Baş Komandan, Prezident İlham Əliyevin sərəncamlarına əsasən “Vətən uğrunda” medalı və 3-cü dərəcəli “Vətənə xidmətə görə” ordeni ilə təltif edilib.
Sahilin atası Sarıbala kişi 32 ildir müəllim işləyir. Hazırda Sahilin təhsil aldığı şəhid Müqəddəs Hacıyev adına Ərəb kənd ümumi orta məktəbin direktoru olan Sarıbala Babayev bildirib ki, oğlu təkcə onun yox, el-obanın başını uca etdi. 21 rəqəmi Sahilin həm doğum, həm evlilik, həm də dəfn günü tarixidir. “Tale elə gətirmişdi ki, o, 1992-ci il martın 21-də dünyaya gəlmiş, 2014-cü il avqustun 21-də evlənmişdi. 2023-cü il sentyabrın 21-də isə dəfn edildi. Bu, Allahın yazısıdır... Sahil 10 il hərbi xidmətdə oldu, Vətəni qorudu, 2020-ci il müharibəsində də iştirak etmişdi. Bir oğlum vardı, onu itirmək çox çətindir. Onlar Qarabağa gedib, torpaqları qaytarsalar da, özləri qayıtmadılar. Vətəni seçdilər. Onunla fəxr edirəm. Təsəllim odur ki, oğlum Vətən uğrunda, torpaqlarımızın bütövlüyü uğrunda, qeyrətimiz, namusumuz uğrunda şəhid oldu”, - deyə şəhid atası əlavə edib.
Qeyd edək ki, şəhid Sahil Babayev ailəli idi. Onun 3 övladı Vətənə əmanət qalıb.
Bölmənin digər xəbərləri
