“Əqrəb mövsümü”nün İngiltərədə təhsil alan gənc aktyoru ilə MÜSAHİBƏ VİDEO
London, 13 iyun, AZƏRTAC
Son illərdə Azərbaycanın kino sahəsində canlanma müşahidə olunur. Gənc rejissorlar, ssenaristlər və aktyorlar bu sahəyə yeni nəfəs gətirir. Bu yaradıcı simalardan biri də “Əqrəb mövsümü” serialında rol alan və hazırda Böyük Britaniyada film və televiziya prodüserliyi üzrə təhsilini davam etdirən gənc azərbaycanlı Arif Mövsümovdur. O, həm aktyorluq, həm prodüserlik sahəsində uğur qazanmaq niyyətindədir. Arif Mövsümov AZƏRTAC-ın London bürosu ilə müsahibəsində uşaqlıq arzularından, Britaniyadakı təhsilindən, “Əqrəb mövsümü”nə necə seçildiyindən və gələcək planlarından danışıb.
-Arif bəy aktyorluq sevgisi sizdə haradan başladı?
-Anam uşaqlıqdan aktrisa olmaq istəyirdi, amma zaman, düşüncələr fərqli idi. O dövrdə valideynlərin övladlarının məşğul olmasına razı olduğu yeganə sənət sahəsi, düşünürəm ki, musiqi idi. Anam da pianoçu oldu, Bakıda konservatoriyada təhsil aldı. Uşaqları olanda isə istəyirdi ki, üç övladından heç olmasa biri incəsənətlə məşğul olsun, fərqi yoxdur, ya rəssamlıq, ya musiqi, ya da başqa bir sahə.
Düşünürəm ki, uşaq yaşlarımdan etibarən incəsənətlə tanış olmaq mənə böyük təsir göstərdi. Mənim uşaqlıqda ən çox zövq aldığım şey dostlarımla oyun oynamaq, müxtəlif obrazlar yaratmaq idi. Bununla da məndə aktyorluğa maraq başladı. Məktəb tədbirlərinə, tamaşalarına qoşulmağa başladım və zaman keçdikcə bu sahəyə daha ciddi yanaşdım.
Məktəbdə dərslərimin əksəriyyəti dramla bağlı idi. Hətta Birləşmiş Krallığa köçdükdən sonra da əsas “A Level” fənnim drama və teatr oldu. (Britaniyada orta məktəbi bitirməzdən əvvəl şagirdlər müəyyən ixtisas fənlərini daha dərindən öyrənirlər və bu mərhələyə “A Level” (Advanced Level) deyilir - RED).
Daha sonra London Musiqi və Dram İncəsənəti Akademiyasında (LAMDA) bir neçə kurs keçdim. Orada xüsusi kurslar var idi, hansı ki, iştirakçılar medal və fərqlənmə sertifikatları əldə edə bilirdilər. “A Level” zamanı aktyorluq üzrə LAMDA-dan qızıl medal qazandım. Amma universitet dövründə istiqamət və marağım bir qədər dəyişdi. Daha çox film istehsalı və rejissorluğa yönəldim. Düzdür, aktyorluqdan tam uzaqlaşmadım, imkan olanda mütləq nəsə edirdim.
Daha sonra təcrübə ili çərçivəsində birillik fasilə götürüb Bakıya qayıtdım. Hadisələr bir-birini izlədi və düşünürəm ki, “Əqrəb mövsümü” filmində rol almaqla bir növ arzum gerçəkləşdi. Bu həm mənim üçün çox dəyərli bir təcrübə, həm də həyatımda unutmayacağım qədər həyəcanlı bir an oldu.
-Rol sizə necə təklif olundu? Hadisələr necə inkişaf etdi?
-Əvvəlcə məni İctimai Televiziyada təcrübəçi kimi işə başladım. Onda heç ağlıma gəlməzdi ki, “Əqrəb mövsümü” serialına çəkiləcəyəm. İlk gün çətin idi, çünki bu, mənim həyatımda ilk peşəkar çəkilişim idi. Bir növ debütüm sayılırdı. Bütün gün ərzində həyəcan içində idim, əllərim əsirdi, amma, eyni zamanda, çox maraqlı idi.
Hiss olunur ki, bu serial Azərbaycanda kino sahəsində bir dönüş nöqtəsidir. Daha azad, dinamik və əyləncəli bir yanaşma var. Texniki baxımdan da, ssenari, obrazlar, effektlər, hamısı daha çox Avropa və Qərb stilindədir və bu çox yaxşıdır. Türkiyə serialları bu cür sərhədsiz mövzularda artıq çox irəlidədir və düşünürəm ki, Azərbaycan da bu yanaşmanı mənimsəyir.
-Böyük Britaniyadakı həyatınız necə gedir. Bura nə vaxt köçmüsünüz? Təhsiliniz haqqında məlumat verərdiniz.
-Mən Birləşmiş Krallığa 2019-cu ildə köçmüşəm. Artıq 6 ilə yaxındır buradayam. Burada təhsilə kollecdə başladım, son iki illik mərhələ idi. Daha sonra isə Bath Universitetinə daxil oldum və orada film və televiziya prodüserliyi üzrə təhsil aldım.
-Burada təhsil almaq yaradıcılığınıza necə təsir etdi?
-Deyərdim ki, böyük təsiri oldu. Əslində, bura gəlməklə yaradıcılığım tam dəyişdi deməzdim, amma mənə onu inkişaf etdirməyə kömək edən imkanlar və alətlər təqdim olundu. Düşünürəm ki, bu bacarıqları Azərbaycana da rahatlıqla aparıb orada da kiməsə dəstək ola bilərəm. Bu mənada çox faydalı oldu.
-Artıq təhsilinizi bitirdiyinizi və bir neçə həftə sonra Azərbaycana qayıdacağınızı dediniz. Bəs Birləşmiş Krallıqda qalmaq və bu sahədə işləməyi düşünmürsünüz? Burda qalıb işləmək çətindirmi?
-Bəli, olduqca çətindir. Bunu mənə universitetdəki müəllimlərim də deyirdi, onların hamısı buradakı film sahəsi ilə sıx əlaqəli peşəkarlardır. Onların da şikayətləri çox idi. Hazırda Böyük Britaniyada film və televiziya sənayesi maliyyə baxımından ciddi çətinliklərlə üzləşir.
Bura gələndə fikrim o idi ki, bu ölkədə çalışım. Amma sonra gördüm ki, çox vaxt əcnəbi sənətçilər əvvəlcə öz ölkələrində tanınır, sonra Birləşmiş Krallıq və ya ABŞ kimi yerlərə dəvət olunurlar. Öz ölkəndə tanınmadan bura gəlib nəyəsə nail olmaq çox çətindir. Ona görə də qərara gəldim ki, ən yaxşısı Azərbaycana qayıdıb, oradakı kino sənayesinin inkişafına öz töhfəmi verim.
-Yeni layihələriniz varmı?
-Bəzi planlar var, amma dəqiq deyə bilmərəm. Hazırda hərbi xidmətə hazırlaşıram. Amma düşünürəm ki, bu da mənim üçün təcrübə olacaq. Aktyor üçün həyatdakı hər bir təcrübə əlavə qazancdır. Bəlkə bir gün hansısa filmdə əsgər obrazını canlandıracağam, bu zaman bu təcrübə çox kömək edəcək. Prodüserlik baxımından da nizam-intizam öyrədəcək. Xidmət bitəndən sonra təkliflər olar deyə ümid edirəm.
-Gənc aktyorlara nə tövsiyə edərdiniz? Xüsusilə də xaricdə təhsil almaq istəyənlərə?
-Tək tövsiyəm budur ki, dayanmasınlar, əlaqələr qurmaq, yeni fürsətlər axtarmaq, kino sənayesinin içində olmaq üçün daim aktiv olsunlar. Bu sahə çox sürətlə inkişaf edir, fürsətləri əldən verməmək lazımdır. Həmçinin mümkün qədər çox film izləsinlər. Emosional keçidləri anlamaq üçün müxtəlif janrlara baxmaq faydalıdır.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
