Ömrünün 56 ilini pambıqçılığa həsr edən 74 yaşlı Xanım nənənin uğur yolu VİDEO
Saatlı, 1 dekabr, Aydın Yavərzadə, AZƏRTAC
Bu dəfə Saatlı sakini 74 yaşlı özü də, adı da xanım olan Xanım Babayeva haqqında söhbət açacağıq. Zərif cinsin nümayəndəsi olsa da ömrünün hər çağında güclü olmağı ilə seçilən Xanım nənə bu gün də təsərrüfatla məşğuldu. O, həm də bu işlərə hələ 18 yaşında pambıq yığmaqla başlayıb. İllərin təcrübəsi, çəkilən zəhmət hədər getməyib. Hazırda özünün fermer təsərrüfatına rəhbərlik edən Xanım nənə dünən olduğu kimi bu gün də yorulmadan çalışır. AZƏRTAC-ın bölgə müxbiri Xanım Babayeva ilə həmsöhbət olub, onun zəhmət dolu həyat yolu haqqında qeydləri qələmə alıb.
Xanım Babayeva ilə evində görüşdük. Aylardır yetişdirdiyi ağ qızılı tədarük edərək təhvil verib. Söhbətimizin əvvəlində məlum oldu ki, Xanım nənə bu il nə az nə çox düz 20 hektar sahədə pambıq becərib. Deyir ki, torpaq canlıdır ona necə davransan o da sənə elə cavab verər. Zəhmətkeş nənə hazırda rəhbərlik etdiyi fərdi təsərrüfat rəhbəri məqamına isə fəhləlikdən gəlib çatdığını bildirir. "Çox dəqiq xatırlayıram 18 yaşım var idi, tarlaya çatanda bir pambıq sahəsinə baxdım, bir də xarala, düşündüm ki, bu xaralı pambıqla necə dolduracağam. İş, gözümü qorxutmadı və elə həmin gün ən çox pambıq təhvil verən də mən oldum. Mil-Muğanın qızmar düzlərində yarım əsrdən artıqdır ki, çalışıram. Ömrümün 56 ilini bu sahəyə sərf etmişəm, belə hiss edirəm ki, torpaq bir canlı kimidir, sanki onunla danışmaq, ona dərdini demək olur. Torpaqdan ayrıla bilmirəm, bu özümdən asılı deyil. Deyirlər ki, artıq işdən kənarlaş, yaşın ötüb, onlara qarşı bir cavabım olur, məni torpaqdan ayırsanız ölərəm. Yeniyetmə çağlarımdan pambığa bağlı olmuşam. Bir işə sevgi həsr etsən, bərəkəti və neməti bol olar. Elə o vaxtlar yaxşı pambıq yığdığım üçün 1976-cı ildə məni briqadir təyin etdilər. Rəhbərlik etdiyim briqada hər zaman çox məhsul toplayırdı. 1980-ci ildə Heydər Əliyev Saatlıya səfəri zamanı bizim briqadanın çalışdığı tarlaya gəldi. Onunla görüşümüz bizə daha böyük dəstək oldu. Daha sonra bir neçə kolxozda çalışdım. İslahatlardan sonra Bakı fermer təsərrüfatı yaratdım və 1996-cı ildən indiyə kimi öz təsərrüfatıma rəhbərlik edirəm. 1998-ci ildə həmçinin Ulu Öndər Heydər Əliyev və İlham Əliyev Saatlıya səfəri zamanı biz zəhmətkeşlərlə görüşdülər. Dövlətimizin bizə olan diqqət və qayğısını hər zaman hiss etmişik və bu bizi işimizdə daha çox ruhlandırıb. Hər il olduğu kimi, bu il də 20 hektar sahədə pambıq becərmişəm. Mövsüm yaxşı keçib, payız fəsli də bizi incitmədi, ilk yığımda hər hektara 50 sentner, ikinci yığımda isə 10 sentner məhsul əldə etdim. Beləliklə bu il hər hektara 60 sentner məhsul toplamışıq, bu da çox gözəl göstəricidir"
Fədakar kənd təsərrüfatı işçisi kimi tanınan Xanım Babayeva uzun illərin zəhmətinə görə müxtəlif orden və medallarla təltif edilib. "İstər kolxoz dövründə çalışdığım vaxt çəkdiyim əziyyət, istərsə də müstəqillik illərində çəkdiyim zəhmət hər zaman yüksək qiymətləndirilib. Dəfələrlə fəxri fərmanlarla, ordenlərlə təltif olunmuşam. Qəzetlərdə, jurnallarda gördüyüm işlər haqqında yazılar dərc olunub. Keçdiyim zəhmət dolu yol məni bu işə daha da bağlayır. Növbəti ilin əkini üçün də artıq hazıram, pambıq çöpləri tarladan təmizlənib, qış şumu etmişik, növbəti ildə də 20 hektar pambıq əkməyi planlayıram".
Qeyd edək ki, təcrübəli pambıqçı olan Xanım Babayeva "Qırımızı əmək bayrağı", "Əmək şöhrəti" ordeni ilə təltif edilib və 1983-cü ildə kənd təsərrüfatı texnologiyalarını inkişaf etdirdiyinə görə SSRİ Dövlət Mükafatına layiq görülüb. Bundan başqa bürünc, gümüş, qızıl medallarla təltif edilib. Müstəqillik illərində isə fermer təsərrüfat rəhbəri olaraq Əməkdar kənd təsərrüfatı işçisi adına layiq görülüb və medalla təltif olunub, eyni zamanda təqaüdlə təmin edilib. Həmçinin Xanım nənəyə "Heydər Əliyevin 100 illiyi (1923-2023)" yubiley medalı təqdim olunub. Bundan başqa Heydər Əliyev Mərkəzində BMT-nin Cenevrə bölməsinin baş direktoru Tatyana Valovayanın təşəbbüsü, Heydər Əliyev Fondunun, İsveçrə Qadın və Gücləndirmə Assosiasiyasının dəstəyi ilə keçirilən “Çağırışın 17 siması” (“17 Faces of Action”) adlı sərgidə adı çəkilən 17 xanımdan biri də məhz Xanım Babayeva olub.
Bölmənin digər xəbərləri
