MƏDƏNİYYƏT
FİKRƏT ƏMİROV ADINA AZƏRBAYCAN DÖVLƏT MAHNI VƏ RƏQS ANSAMBLI BEYNƏLXALQ FESTİVALDA İŞTİRAK EDİR
AZƏRTAC xəbər verir ki, Fikrət Əmirov adına Azərbaycan Dövlət Mahnı və Rəqs Ansamblı Qazaxıstanın Astana şəhəri Mədəniyyət Departamentinin dəvəti ilə burada iyulun 3-dən 7-dək keçirilən II Beynəlxalq xalq rəqsləri “Şasu” festivalında iştirak edir.
Bu kollektiv 1936-cı ildə Azərbaycan klassik musiqisinin banisi Üzeyir Hacıbəyov tərəfindən Dövlət Filarmoniyasının nəzdində yaradılmışdır. Müxtəlif dövrlərdə ansambla rəhbərlik etmiş şəxslər xalq mahnı və rəqslərimizin beşiyi sayılan Şamaxı, Qazax, Şuşa, Şəki və sair bölgələrə gedərək zəngin materiallar əldə etmiş, kollektivin repertuarını xeyli zənginləşdirmişlər. Həmin vaxtlarda öyrənilmiş bir çox rəqslər - “Mirzəyi”, “İnnabı”, “Qazağı”, “Şəki”, “Yallı”, “Uzundərə” və başqaları bu gün də səhnə həyatı yaşayır.
Təkcə ölkəmizdə deyil, Çin, Hindistan, Avstriya, Anqola, Italiya, İspaniya, Meksika, Misir, Almaniya, Yaponiya və sair xarici ölkələrdə uğurlu çıxışları ilə şöhrət qazanmış F.Əmirov adına Azərbaycan Dövlət Mahnı və Rəqs Ansamblı festivalda geniş repertuarla çıxış edəcəkdir. Kollektiv C.Cahangirovun “Bulaq başında” süitası, milli rəqs “Şalı-şal”, “Nağaralarla rəqs”, “Gənclik” rəqsi, “Turacı”, A.Əlizadənin “Bayram rəqsi” və sair musiqi nümunələrini təqdim edəcəkdir.
Rəqslərin mahnılarını ansamblın solisti Almaz Orucova ifa edəcəkdir.