Məhəmməd Hadi - zirvəyə yüksələn şair
Şamaxı, 1 oktyabr, Adil Ağayev, AZƏRTAC
Mədəniyyət və Turizm Nazirliyinin “Xalq yaradıcılığı paytaxtları” proqramı çərçivəsində 2015-ci ildə “Azərbaycanın Ədəbiyyat Paytaxtı” seçilən Şamaxıda “Məhəmməd Hadi filosof şair kimi” mövzusunda “dəyirmi masa” keçirilib.
AZƏRTAC xəbər verir ki, rayon mərkəzi kitabxanasında keçirilən “dəyirmi masa”da ziyalılar, fəal oxucular iştirak ediblər.
Tədbiri açan rayon mədəniyyət və turizm şöbəsinin məsləhətçisi Rəfail Tağızadə XIX əsr və XX əsrin əvvəllərində Şamaxıda çox zəngin ədəbi mühitin olduğunu diqqətə çatdıraraq, həmin dövrdə bu qədim məkanda Mirzə Nəsrullah Bahar Şirvani, Mirzə Nəsrullah Didə, Məhəmməd Səfa, Molla Ağa Bixud, Mirzə Mahmud Zui, Ağali Bəy Naseh, Seyid Əzim Şirvani, Molla Qadir Hacı Şirvani, Mirzə Ələkbər Sabir, Abbas Səhhət, Məhəmməd Hadi və başqa istedadların Azərbaycan ədəbiyyatı və mədəniyyətinə nadir incilər bəxş etdiklərini vurğulayıb.
“Dəyirmi masa”da çıxış edən 9 saylı şəhər tam orta məktəbin ədəbiyyat müəllimi Pərviz Maqsudov deyib: “M.Hadi zirvəyə yüksələn elə bir sənətkardır ki, onun yaradıcılığını dərinliyi ilə araşdırsaq, bu yaradıcılığın nə qədər rəngarəng və zəngin olduğunu bir daha görmüş olarıq. Onun “Nəğmeyi-əhrəranə”, “Biz nə haldayıq?”, “Təraneyi-qəmpərvəranə” və sair şeirləri lirik yaradıcılığın şah əsərləridir”.
Tədbirdə çıxış edən Ərəstun Xələfov, Hicran Məmmədova və başqaları Məhəmməd Hadini romantik şair adlandıraraq, bu romantizmin kor-koranə xülyalar və utopiyalar yığnağı olmadığını diqqətə çatdırıblar. Vurğulanıb ki, şair romantik-realist ədəbi qolun aparıcı qüvvələrindən hesab olunur. Onun özünəməxsus realizm baxışları var. Hadi nəsihət xarakterli şeirləri ilə insanlara müraciət edir. Əslində, onun şeirlərində pis insan obrazı yoxdur, pis əxlaq və naqis xislət məsələsi vardır. O, belə düşünürdü ki, hər bir insan, vətənini sevən hər bir vətəndaş öz əməllərində olan pis əxlaqını, naqis xislətini və yaramaz əməllərini özü düzəltsə, cəmiyyət də özü-özünə düzələrək yaxşılığa doğru inkişaf edəcəkdir. Hadi tərbiyənin doğru verilməsinin tərəfdarı idi. O, əqidənin saflığı və amalın düzgünlüyü məsələsinə önəm verirdi.
Bölmənin digər xəbərləri
