AAKM-DƏ ƏCNƏBİLƏRİN ALMANİYA CƏMİYYƏTİNƏ İNTEQRASİYASINA HƏSR OLUNMUŞ TƏDBİR KEÇİRİLMİŞDİR
Berlin, 25 sentyabr (AZƏRTAC). Almaniyadakı Azərbaycanlıların Koordinasiya Mərkəzində (AAKM) bu ölkəyə emiqrant kimi gəlmiş əcnəbilərin alman cəmiyyətinə inteqrasiyası ilə bağlı tədbir keçirilmişdir.
Azərbaycanın Almaniyadakı səfirliyinin dəstəyi ilə keçirilən tədbirdə problemin tarixi, sosial aspektlərinə nəzər salınmış, bu ölkəyə köçmüş azərbaycanlı emiqrantların cəmiyyətə inteqrasiyasındakı nailiyyət və problemlərdən danışılmışdır.
Müzakirələrdə AAKM-in icraçı direktoru Samirə Patzer-İsmayılova, politoloq, Bundestaqın elmi işçisi Heiko Langner, Berlin şəhərinin İntegrasiya, İş və Sosial məsələlər üzrə senatoru xanım Dr. Haydi Knake-Werner, Berlin senatının üzvü, 2009-cu ildə keçiriləcək seçkilərdə Bundestaq üzvlüyünə namizəd, Sollar Partiyasının iqtisadi-siyasi məsələlər üzrə məsul katibi Ştefan Libix və digərləri çıxış etmişlər. Bildirilmişdir ki, Almaniyada ötən əsrin 60-cı illərindən başlayaraq xarici ölkələrdən buraya işçi qüvvəsi axınının artması ilə əlaqədar “Əcnəbiləri qəbul edən ölkə” dövlət proqramının tətbiqinə başlanılmışdır. Bu cür sürətli axın qarşısında alman cəmiyyətinin çoxmillətli bir topluma çevrilməsi və yeni məqsədlərin ortaya çıxması belə bir proqramın hazırlanmasını zəruri etmişdir.
Qeyd edək ki, Almaniya əhalisinin beşdəbir hissəsini əcnəbilər təşkil edir. Lakin yerli əhali və əcnəbilərin birgə yaşaması, cəmiyyətdə eynihüquqlu təmsil olunması məsələsi uzun illər diqqətdən kənarda qalmış, emiqrantların yerli şərait və şərtlərə inteqrasiyasını ləngitmişdir. Son zamanlar bu sahədə ciddi elmi araşdırmalar aparılmışdır. Belə bir nəticə əldə olunmuşdur ki, Almaniyaya köçüb gəlmiş əcnəbilərin bir hissəsi biliklərini təkmilləşdirmək, öz ixtisasları üzrə çalışmaq baxımından cəmiyyətdən kənarda qalmışdır. Onlar, həmçinin, hüquqlarından tam istifadə edə bilmir, dövlət yardımına ehtiyac duyurlar. Bu kateqoriya adamlar arasında işsizlik geniş yayılmışdır. Hətta emiqrantların ilk nəsli alman dilinə lazımi qədər yiyələnmək problemi yaşayır. On illərlə Almaniyada yaşamalarına baxmayaraq, onların təxminən yarısı Almaniya vətəndaşlığı almamışdır, istər aktiv, istərsə də passiv şəkildə seçkilərdə iştirak etmək hüquqları yoxdur. Buna görə də əcnəbilərin bir çoxu özünü yerli cəmiyyətdən təcrid olunmuş, məhdud çərçivəyə salınmış kimi hiss edir. Tədbirdə Almaniyada yaşayan azərbaycanlıların bir qisminin də sözügedən problemlə qarşılaşdığı barədə geniş söhbət açılmışdır.
Müzakirələrdə qeyd edilmişdir ki, Berlində emiqrantların cəmiyyətə integrasiyası siyasəti sahəsində yeni imkanlar araşdırılmışdır. Berlin senatı bu məsələ ilə bağlı ekspertlərin yüksək qiymətləndirdiyi yeni inteqrasiya konsepsiyası hazırlamış, artıq onun həyata keçirilməsinə başlamışdır. Bu sənədə görə, əcnəbilərin bütün sahələrdə iştirakı, fəallaşması konkret və sınaqdan keçirilmiş “İnkişaf layihələri“ vasitəsilə reallaşdırılmalıdır. Skandinaviya təcrübəsinə əsaslanan layihələrə görə, inteqrativ məktəblərdə oxuyanlar bir-biri ilə daha çox vaxt keçirməli və bir-birindən öyrənməklə yanaşı, fərdi şəkildə də inkişaf etməlidirlər. Aztəminatlı təbəqədən, eləcə də köçkün ailələrindən olan uşaqların erkən yaşlarından sosial baxımdan təcrid olunması uzunmüddətli proseslə aradan götürülməlidir. Konsepsiyaya görə, həmçinin, müəyyən təşkilatların maliyyələşdirdiyi iş sektoru uzun müddət işsiz olmuş əcnəbilərin qarşısında yeni imkanlar açır. Bu sektorun təklif etdiyi iş yerləri işsizlərə öz əməyi sayəsində pul qazanmasına və bütün sosial sığortaları ödəməsinə imkan verir. Bu konsepsiya ilə bağlı bütün sualları Berlin parlamentinin üzvü Stefan Liebich cavablandırmış və gələcəkdə görüləcək işlər barədə məlumat vermişdir.
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
