CƏMİYYƏT
“Ağacların kəsilməsinə yox” proqramı çərçivəsində Nərimanov rayonu ərazisində növbəti ağacəkmə aksiyası
Bakı, 16 iyul (AZƏRTAC). İyulun 16-da IDEA (Ətraf Mühitin Mühafizəsi Naminə Beynəlxalq Dialoq) İctimai Birliyinin təşəbbüsü ilə “Ağacların kəsilməsinə yox” proqramı çərçivəsində Bakının Nərimanov rayonu ərazisində növbəti ağacəkmə aksiyası keçirilib.
İctimai Birlikdən AZƏRTAC-a bildiriblər ki, aksiyanın keçirilməsinə səbəb bu il iyulun 4-də Bakının Nərimanov rayonunun Ağa Nemətulla küçəsi, 67 ünvanında 13 ədəd ağacın kəsilməsi faktının IDEA İctimai Birliyinin “Təbiətə təcili yardım” mobil qrupu tərəfindən qeydə alınması olmuşdur. (http://ideacampaign.org/az/anket_33.html#.U8Uwgo2Sw28).
Aksiya zamanı ümumi sayı 20 olan sərv, Şərq çinarı və tut ağacı əkilmişdir.
Bu cür aksiyaların məqsədi ağac əkməklə ekoloji balansın bərpasına, təbii mühitin qorunmasına kömək etmək, atmosferi oksigenlə zənginləşdirmək, insanların diqqətini yaşıllıqların qorunmasına yönəltməkdir.
“Ağacların kəsilməsinə yox” proqramı Heydər Əliyev Fondunun və IDEA İctimai Birliyinin birgə təşəbbüsü ilə həyata keçirilir. Proqram Azərbaycanda, xüsusilə Bakı şəhərində qeyri-qanuni ağac kəsilməsi hallarının qarşısının alınmasını nəzərdə tutur. Bu məqsədlə “Təbiətə təcili yardım” “Qaynar xətt”i (1113) və mobil qrupu yaradılıb.