Ağdamda “Vətəndaş iştirakçılığının təşkili” mövzusunda seminar təşkil edilib
Bakı, 19 avqust, AZƏRTAC
Qaçqınların və Məcburi Köçkünlərin İşləri üzrə Dövlət Komitəsi Ağdam rayonunda Böyük Qayıdışa dair I Dövlət Proqramının icrasına cəlb olunmuş dövlət qurumlarının nümayəndələri üçün “Vətəndaş iştirakçılığının təşkili” mövzusunda tədbir keçirib.
Dövlət Komitəsindən AZƏRTAC-a bildirilib ki, qarşılıqlı fikir mübadiləsinin aparıldığı seminarın məqsədi azad edilmiş ərazilərə qayıdış prosesində vətəndaş iştirakçılığının təşkili və gücləndirilməsi ilə bağlı praktiki bilik və təcrübələrin paylaşılması olub.
Prezident İlham Əliyevin rəhbərliyi ilə həyata keçirilən Böyük Qayıdışın ölkəmizin tarixində misilsiz hadisə olduğu, doğma yurda geri dönən həmvətənlərimizin təhlükəsiz yaşayışı və iqtisadi fəaliyyətə inteqrasiya üçün zəruri iş aparıldığı bildirilib.
Böyük Qayıdışa dair I Dövlət Proqramının icrasına töhfə vermək məqsədilə keçmiş məcburi köçkünlərin yeni mühitə inteqrasiyasını asanlaşdırmaq, texniki və peşə bacarıqlarını inkişaf etdirmək, gəlir gətirən fəaliyyətlərə cəlb olunmalarını dəstəkləmək və vətəndaş iştirakçılığını artırmaq istiqamətində ardıcıl və planlı tədbirlər həyata keçirildiyi qeyd edilib.
Vurğulanıb ki, bu fəaliyyətlər çərçivəsində məşğulluq imkanlarının genişləndirilməsi, gender bərabərliyinin təmin edilməsi və dayanıqlı inkişaf məqsədlərinin sosial-iqtisadi aspektlərinin gücləndirilməsi Dövlət Komitəsinin əsas prioritetləri sırasındadır.
İnteraktiv formada keçirilən seminarda iştirakçılara vətəndaş iştirakçılığı, onun məqsədi, dövlət qurumları üçün faydaları, iştirakçılığın mərhələləri, planlaşdırılması və həyata keçirilməsi, qiymətləndirmə, monitorinq, vətəndaş iştirakçılığı və dövlət dəstəyi haqqında məlumat verilib, beynəlxalq və yerli təcrübələr müzakirə edilib. Eyni zamanda, Böyük Qayıdış çərçivəsində həyata keçirilən fəaliyyətlərin səmərəliliyinin artırılması məqsədilə dövlət qurumları arasında koordinasiyanın əhəmiyyəti vurğulanıb.
Seminarda iştirak edən dövlət qurumlarının əməkdaşları, keçmiş məcburi köçkünlərin doğma yurdlarına qayıdışı və uğurlu reinteqrasiyasına hazırlıq prosesində vətəndaş iştirakçılığının təşkil edilməsi üzrə praktik biliklərinin artırılması baxımından tədbirin əhəmiyyətli olduğunu qeyd edərək, gələcəkdə də bu kimi maarifləndirici təşəbbüslərin davam etdirilməsinin vacibliyini ifadə ediblər.
Seminarda Azərbaycan Respublikasının Qida Təhlükəsizliyi Agentliyi, Dövlət Məşğulluq Agentliyi, Azərbaycan Respublikasının Minatəmizləmə Agentliyi, Ailə, qadın və uşaq problemləri üzrə Dövlət Komitəsi, Elm və Təhsil Nazirliyi, Gənclər və İdman Nazirliyi, Kənd Təsərrüfatı Nazirliyi, Mədəniyyət Nazirliyi, Səhiyyə Nazirliyi, Dövlət Şəhərsalma və Arxitektura Komitəsi və Dövlət Turizm Agentliyinin əməkdaşları iştirak ediblər.
Bölmənin digər xəbərləri
