Albaniyada Xocalı faciəsi qurbanlarının xatirəsi anılıb
Afina, 23 fevral, AZƏRTAC
Tiranada yerləşən Luarasi Universitetində XX əsrin sonunda ermənilərin azərbaycanlılara qarşı həyata keçirdiyi ən ağır cinayət - Xocalı soyqırımının 30-cu ildönümünə həsr olunmuş tədbir keçirilib.
AZƏRTAC xəbər verir ki, tədbirdə Luarasi Universitetinin rəhbərliyi, müəllim, professor və tələbə heyəti iştirak ediblər.
Universitetin rektoru Ethem Ruka çıxışında ikitərəfli əməkdaşlıq və universitetlər arasında əlaqələrin genişləndirilməsi imkanları barədə öz fikirlərini bölüşüb.
Azərbaycanın Yunanıstanda və Albaniyadakı səfiri Anar Hüseynova təqdimatla çıxış edərək müstəqillik dövründə ölkəmizin qarşılaşdığı çağırışlar, əldə etdiyi nailiyyətlər haqqında ətraflı məlumat verib.
Təqdimat zamanı 30 il Xocalıda törədilən qətliamı şərtləndirən səbəblər, eləcə də faciənin tanıdılması istiqamətində görülmüş işlərə xüsusi diqqət yönəldilib. Hadisələrin baş verdiyi dövrdə keçmiş sovet rəhbərliyinin birbaşa dəstəyi ilə Ermənistanın Azərbaycana qarşı hərbi təcavüzünün yenicə müstəqillik qazanılmış dövlətimiz üçün böyük çətinliklər törətdiyi xüsusi qeyd olunub. Bildirilib ki, ermənilər xarici havadarlarının dəstəyi ilə Azərbaycanın beynəlxalq səviyyədə tanınmış ərazilərinin 20 faizini işğalı edib, azərbaycanlılara qarşı etnik təmizləmə siyasəti həyata keçirib. Nəticədə bir milyondan çox azərbaycanlı qaçqın və məcburi köçkün vəziyyətinə düşüb. Ermənistanın qeyri-insani davranışlarının ən yüksək həddi isə düz 30 il əvvəl - 1992-ci il fevralın 26-da törədilmiş Xocalı qətliamı olub. Diqqətə çatdırılıb ki, Xocalı soyqırımı Azərbaycan tarixinin ən dəhşətli və faciəli səhifələrindən biridir və xalqımızın yaddaşında silinməz iz buraxıb. Xocalı soyqırımı Ermənistan silahlı qüvvələrinin Qarabağa nəzarəti ələ almaq üçün mülki azərbaycanlılara qarşı törətdiyi ən qanlı hadisələrdən biri kimi qiymətləndirilir.
Diplomat, həmçinin müstəqilliyini bərpa etdikdən sonra Azərbaycanın keçdiyi yol, qazandığı iqtisadi yüksəliş, Ermənistanın ölkəmizə qarşı hərbi təcavüzü, 30 illik işğal və 44 günlük Vətən müharibəsi barədə də iştirakçılara məlumat verib.
Daha sonra universitetin prorektoru Daniel Dərvişi çıxış edərək, törədilən faciə haqqında fikirlərini bölüşüb, səfirə regionda baş verən proseslərə dair suallar ünvanlayıb.
Sonda təqdimatla müvafiq videomateriallar nümayiş olunub.
Qeyd edək ki, tədbir zamanı Azərbaycanın tarixini, mədəniyyətini və eləcə də qanlı hadisələri və Xocalı soyqırımını özündə əks etdirən Azərbaycan və alban dillərində nəşr olunmuş kitablar tədbir iştirakçılarına paylanılıb.
İqbal Hacıyev
AZƏRTAC-ın xüsusi müxbiri
Afina
Bölmənin digər xəbərləri
