Alev Kuru - Anadoludan Azərbaycana könül körpüləri
Ankara, 29 yanvar (AZƏRTAC). Türkiyənin ən nüfuzlu ali təhsil ocaqlarından biri olan Qazi Universitetində Anadoludan Azərbaycana könül körpüləri quran bir xanım - incəsənət fakültəsinin dekanı, professor Alev Çakmakoğlu Kuru həyatını türk dünyasının mədəni irsinin təbliğinə həsr etmişdir.
Türkiyənin tananmış siyasi xadimlərindən biri olan Səbahəddin Çakmakoğlunun ailəsində dünyaya göz açmış və türk millətinə sədaqət ruhunda böyümüş Alev xanım AZƏRTAC-ın xüsusi müxbiri ilə söhbətində gənclik illərini xatırlayır, tələbə olduqları zaman Azərbaycanın istiqlal şairi Əhməd Cavadın sözlərinə bəstələnmiş “Çırpınırdı Qara dəniz” türküsünü meydanlarda göz yaşları ilə dinlədiklərini, qəlbi hər zaman qardaş Azərbaycanla birlikdə döyündüyünü söyləyir.
Alev xanımın Səlcuqlar və bəyliklər dövrü mədəni irsinin tədqiqatı üzrə elmi əsərlərində də Azərbaycan və Anadolunun ortaq tarixi-mədəni irsi geniş yer almışdır. Kayserideki Şah Kutluğ Xatun türbəsi ilə yanaşı, Atabəylər dövlətinin paytaxtı olmuş Naxçıvandakı Möminə Xatun türbəsi də bu tədqiqatlarda yer almışdır. Oğuz türklərinin xalı sənəti, memarlıq inciləri, arxeoloji tapıntılar müxtəlif beynəlxalq elmi konfranslarda təqdim olunmuşdur. “Mən türkəm və bu kimliyimlə hər zaman fəxr edirəm”, deyən alimin fikrincə, Məhəmməd Füzuli poeziyası, Dədə Qorqud və Koroğlu dastanları, Mövlana Cəlaləddin Rumi və Şəms Təbrizi fəlsəfi irsi və digər ortaq dəyərlərimizin təbliği bizim dünya mədəniyyətinə necə böyük töhfələr verdiyimizi göstərməlidir.
Böyük təbəddülatlar, torpaqlarının müdafiəsi naminə amansız savaşlar yaşamış Azərbaycan və Anadolu türklərinin maddi və mənəvi sərvətini yaşatmaq başlıca olaraq milli kimliyimizin qorunmasına xidmət edir. Alev xanım da bu məqsədlə 2008-ci ildə universitetdə “Türk dünyasında müharibələrin sənətə təsiri” mövzusunda beynəlxalq konfrans təşkil etmişdir. Onun sözlərinə görə, bu torpaqlarda yaşayırıqsa, ana torpağın bizə məxsus olduğunu hər zaman yeni faktlarla göstərməliyik. Konfransdan sonra buraxılan musiqi albomunda isə ilk sırada Qarabağ şikəstəsi yer aldı.
Professor Alev Kurunun təşəbbüsü ilə 2011-ci ildə keçirilmiş daha bir mötəbər tədbir - Türk dünyası incəsənət fakültələrinin Ankara toplantısı da ortaq mədəni irsimizin qorunması və təbliği baxımından mühüm addım oldu. Azərbaycandan dosent Sevil Süleymanova, Dövlət İncəsənət Akademiyasından Arif Əzizov və Ayan Əzizovanın tablolarının da yer aldığı sərgi bu toplantıya bir özəl rəng qatdı.
Gözəl bir ana və Anadolu türkünün təbiri ilə desək “manqal kimi ürəyi” olan Alev xanım Xocalı soyqırımının təbliğində qardaş ölkədə ən çox səy göstərən ziyalılardan biridir. “İki hadisə mənim içimi sızlatdı”, deyir bu nəcib xanım. İstanbul və Ankaranın küçələrində bəzilərinin “hamımız erməniyik” şüarları və Axtamar kilsəsinin restavrasiya edilib ibadətə açılması. Axı, bu kilsənin ərazisində erməni quldurlarının namusuna təcavüz etmək istədiyi, bunun üçün öz canlarına qıyan türk qızlarının nakam ruhları dolaşır!
Bir qadın, elm adamı və ictimai xadim kimi, Alev Kuru Heydər Əliyev Fondunun prezidenti Mehriban xanım Əliyevanın Xocalı soyqırımı, Azərbaycan türkünün mədəni irsinin dünyada tanıdılması istiqamətindəki fəaliyyətini izlədiyini və çox bəyəndiyini vurğulayır. Ən başlıcası, bir çox hallarda siyasət və diplomatiyanın ifadə edə bilmədikləri həqiqətləri elm və incəsənət dili ilə söyləməkdir. Xocalı soyqırımının 20-ci ildönümündə Qazi Universiteti, Azərbaycanın Türkiyədəki səfirliyi və Azərbaycan Dövlət Tibb Universitetinin təşəbbüsü, TRT və İctimai televiziyanın informasiya dəstəyi ilə keçirilən möhtəşəm telekörpü bu cür addımladan biri oldu. Alev xanımın rəhbərliyi ilə “Şahidlər və şəhidlər” sənədli filmi də Türkiyə mediasının diqqət mərkəzində oldu. Bu il isə Qazi Universiteti “Xocalı qətliamı - böyük cinayət” filmini təqdim edəcəkdir. Professor Yusuf Halaçoğlunun elmi məsləhətçisi olduğu bu filmdə ötən əsrin əvvəllərində Anadoluda və Azərbaycanda erməni quldur dəstələrinin törətdikləri qətliamlardan Xocalı soyqırımına qədər bir qanlı tarix öz əksini tapacaqdır. Türkiyə Xarici İşlər Nazirliyi ilə də əlaqə yaradılmış, bu sənədli filmi xarici ölkələrdə təqdim etmək üçün səy göstəriləcəkdir.
“Xocalı təkcə Azərbaycana qarşı deyil, Türkiyə və bütün türk dünyasına qarşı törədilmiş ağır cinayətdir”, deyən Alev xanım soyqırımının 21-ci ildönümündə keçiriləcək tədbirdə qətlə yetirilmiş günahsız insanların xatirəsini anmaq üçün final səhnəsində 613 tələbənin səhnədə yer alacağını, köklü bir ağacın budaqlarına bir üzündə Türkiyə, digərində Azərbaycan bayraqları təsvir olunmuş 613 çinar yarpağının asılacağını söylədi. Bundan başqa, builki tədbirə Qazaxıstandakı Ahmet Yəsəvi və Qırğızıstandakı Manas universitetləri də cəlb olunacaqdır.
Həmsöhbətim sözlərini bir müəllimin düşüncələri ilə bitirir: “Bütün bu tədbirlər bizim gənclərimizin milli ruhda tərbiyəsinə xidmət edir. Çünki torpaqlarımızı qoruyacaq, mədəniyyətimizi, adət-ənənələrimizi yaşadacaq da onlardır. Mən Türkiyədə yeni Yüksək Təhsil Kurumu qanun layihəsinin xaricilərin universitet açması ilə bağlı maddəsinə də bu səbəbdən etiraz etdim. Axı, sabah İstanbulda bir fransız universiteti açılır və orada saxta erməni iddiaları təbliğ olunursa, bu bizim gələcəyimizə təhlükə yaradacaq”!
Oqtay Bayramov
AZƏRTAC-ın xüsusi müxbiri
Ankara
Bölmənin digər xəbərləri
