Almaniya hökumətində yer alan partiyalar hərbi xidmət haqqında qanun layihəsi barədə razılığa gəlib
Berlin, 26 avqust, AZƏRTAC
Almaniyada federal hökumətdə yer alan partiyalar hərbi xidmət haqqında qanun layihəsi ilə bağlı razılığa gəlib.
AZƏRTAC “Tagesschau” xəbər xidmətinə istinadla bildirir ki, hökumətin sözçüsü Stefan Kornelius Xarici İşlər Nazirliyinin layihə ilə bağlı iradı geri götürdüyünü və qanun layihəsinin hökumətin müzakirəsinə çıxarılacağını təsdiqləyib.
Xarici işlər naziri Yohan Vadeful bir müddət əvvəl bu layihəyə qarşı çıxmışdı. Lakin aparılan danışıqlardan sonra Y.Vadeful etirazını geri götürüb. Beləliklə, müdafiə naziri Boris Pistorius layihəni dəyişdirmədən Nazirlər Kabinetinə təqdim edəcək. Hökumət tərəfindən təsdiqləndikdən sonra layihə parlamentin müzakirəsinə çıxarılacaq.
Qeyd edək ki, Xristian Demokratlar İttifaqı (CDU) və Xristian Sosialistlər İttifaqı (CSU) ilə Sosial Demokrat Partiyası (SPD) arasında hərbi xidmətin necə təşkil olunmasına dair fikir ayrılığı var idi. İlk mərhələdə könüllülük prinsipinə üstünlük verən SPD İttifaqdan fərqli olaraq konkret çağırış hədəflərini müəyyən etmək istəmir. CDU isə qanun layihəsində əsgər sayının hər il necə artırılmasının qeyd olunmasını məqsədəuyğun hesab edir.
Qanun layihəsinin avqustun 27-də kabinetin Müdafiə Nazirliyində keçiriləcək iclasında təsdiqlənməsi nəzərdə tutulur. Bu, son 20 ildə nazirlikdə keçiriləcək ilk hökumət iclası olacaq. Hökumət bununla Bundesverə böyük önəm verdiyini nümayiş etdirmək istəyir.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
