Almaniyada hökumətin proqram təminatı və IT üzrə xərcləri xeyli artıb
Berlin, 21 iyun, AZƏRTAC
Ötən il Almaniya hökumətinin proqram təminatı, bununla bağlı müvafiq lisenziyalar və digər IT xidmətləri üzrə xərcləri 1,2 milyard avronu keçib. Bu, 2023-cü illə müqayisədə 25 faizdən çoxdur.
AZƏRTAC “Spiegel” qəzetinə istinadla xəbər verir ki, bu barədə Bundestaqın Sol Partiyadan olan deputatı Ditmar Barçın sorğusuna hökumətin cavabında bildirilib.
Məlumata əsasən, ən çox artım proqram təminatı lisenziyaları üzrə olub. Bu sahəyə ayrılan vəsait üç dəfədən çox artaraq 160,2 milyon avro təşkil edib. Digər proqram təminatı xərcləri isə 38,4 faiz artaraq 224,3 milyon avroya çatıb. IT xidmətlərinə çəkilən xərclər isə 13,4 faiz artımla 884,4 milyon avroya yüksəlib. Hökumətin məlumatında bu rəqəmlərin yalnız federal nazirlikləri əhatə etdiyi qeyd olunub.
Deputat Ditmar Barç Almaniyanın rəqəmsallaşma sahəsində daha sürətli hərəkət etməsinin vacibliyini bildirib. O, koalisiya hökumətinin xərcləri azaldan və texnologiya nəhənglərindən asılılığı minimuma endirən proqram təminatı strategiyasına ehtiyacı olduğunu vurğulayıb.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
