ALMANİYADAKI SOYDAŞLARIMIZ DAHİ BƏSTƏKAR ÜZEYİR HACIBƏYLİNİN XATİRƏSİNİ ANACAQLAR
Bakı, 17 sentyabr (AZƏRTAC). Diasporla İş üzrə Dövlət Komitəsinin mətbuat xidmətindən bildirmişlər ki, sentyabrın 18-də Berlində Almaniyadakı Azərbaycanlıların Koordinasiya Mərkəzində (AAKM) Azərbaycan klassik musiqisinin banisi Üzeyir Hacıbəylinin anadan olmasının 124 illiyi münasibətilə tədbir keçiriləcəkdir.
“Xalq musiqisi tükənməz bir xəzinədir” devizi altında təşkil olunacaq tədbirdə Ü.Hacıbəylinin “Koroğlu” operasından uvertüra səsləndiriləcək, Azərbaycanın Almaniyadakı səfirliyinin ikinci katibi Ramil Fərzəliyev qonaqlara hər il ölkəmizdə keçirilən “Üzeyir musiqi günü” ilə bağlı məlumat verəcəkdir.
AAKM-nin icraçı direktoru Samirə Patzer-İsmayılova “Üzeyir Hacıbəylinin irsi”, Potzdam Universitetinin doktorantı Maisə Əliyeva isə “Üzeyir Hacıbəylinin həyat pillələri” mövzularında çıxışlar edəcəklər. Tədbirdə dahi Üzeyir bəyin publisistikasından da söhbət açılacaq, ölməz bəstəkarın “O olmasın, bu olsun” musiqili komediyası əsasında çəkilmiş bədii filmdən parçalar göstəriləcəkdir.
Tədbir Azərbaycanın Almaniyadakı səfirliyinin dəstəyi ilə keçiriləcəkdir.
Bölmənin digər xəbərləri
