Alternativ və Bərpa Olunan Enerji Mənbələri üzrə Dövlət Agentliyi ağacəkmə aksiyası keçirib
Bakı, 16 mart, AZƏRTAC
Alternativ və Bərpa Olunan Enerji Mənbələri üzrə Dövlət Agentliyinin (ABOEMDA) təşkilatçılığı və agentliyin Həmkarlar İttifaqı Komitəsinin (HİK) təşəbbüsü ilə Bakı-Quba yolunun 32-ci kilometrliyində ağacəkmə aksiyası keçirilib.
ABOEMDA-nın mətbuat katibliyindən AZƏRTAC-a bildirilib ki, korporativ sosial məsuliyyət siyasəti çərçivəsində keçirilən aksiyanın məqsədi ekoloji balansın bərpası, atmosferin oksigenlə zənginləşdirilməsi, ətraf mühitin təhlükəsizliyinin və insanların sağlamlığının təmin edilməsi olub. Aksiyada Dövlət Agentliyinin, “Azalternativenerji” MMC-nin və “Azgüntex” zavodunun yüzdən çox əməkdaşı iştirak edib.
Tədbir çərçivəsində mövcud yaşıllıqlara qulluq göstərilib, 1000-ə yaxın yeni ağac əkilərək onların sahəsi artırılıb. Aqrotexniki qaydalara uyğun, səliqə ilə əkilən tinglərin dibləri bərkidilib və suvarılıb. Bundan sonra da yaşıllıqların artırılması, yeni ağacların əkilməsi istiqamətində davamlı tədbirlər həyata keçirilməsi nəzərdə tutulur.
Bölmənin digər xəbərləri
