AMEA-NIN HUMANİTAR VƏ İCTİMAİ ELMLƏR BÖLMƏSİNİN İLLİK HESABATI
Bölmənin rəhbəri, MEA-nın müxbir üzvü Ağamusa Axundov məruzəsində bildirmişdir ki, hesabat ili Azərbaycan elminin böyük himayədarı Prezident Heydər Əliyevin “Azərbaycan Milli Elmlər Akademiyasının Nizamnaməsinin təsdiq edilməsi haqqında” və “Azərbaycan Milli Elmlər Akademiyasının statusu haqqında” Fərmanları ilə başlanmışdır. Bölmə öz işini Prezident Fərmanları və onların həyata keçirilməsi haqqında AMEA Rəyasət Heyətinin qərarı əsasında qurmuş, bir çox dövlət və hökumət proqramlarının hazırlanmasında və ya onlara rəy verilməsində iştirak etmişdir. İçərişəhərin YUNESKO-nun təhlükədə olan abidələr siyahısına salınması, “Böyük Volqa yolu” konfransı ilə bağlı təkliflər, Ağstafa rayonunun ərazisindəki mağaralar kompleksi haqqında məlumat, Çıraqqala tarixi qoruğunun bərpasına dair tədbirlər planı, Gürcüstan ərazisindəki abidələrimizin tədqiqi üzrə işçi qrupunun yaradılması ilə bağlı təkliflər hazırlamış, “ Şabran şəhəri” tarix və mədəniyyət abidəsinin qorunması haqqında” Azərbaycan Respublikası Prezidentinin Sərəncamına əsasən, tədbirlər planının hazırlanmasında iştirak etmişdir. Xarici İşlər Nazirliyinin xahişi ilə Azərbaycanın bütün səfirliklərinə və nümayəndəliklərinə göndərilmək üçün Azərbaycan və rus dillərində 1918-ci il mart soyqırımı hadisələrini əks etdirən materiallar hazırlanmışdır.
Hesabat ilində elmi tədqiqat müəssisələri 15 istiqamətdə 62 problem üzrə 177 mövzu üzərində işləmişlər. Yeddi cildlik “Azərbaycan tarixi”nin nəşri başa çatmışdır. İnsan Hüquqları İnstitutunun azsaylı kollektivinin hazırladığı “Erməni terror və quldur birləşmələrinin bəşəriyyətə qarşı cinayətləri (XIX –XXI əsrlər). Müxtəsər xronoloji ensiklopediya” kitabı Azərbaycan dilində buraxılmışdır.
Həmin institutun direktoru, siyasi elmlər doktoru Rövşən Mustafayev Beynəlxalq İnsan Hüquqları Təşkilatının medalı ilə təltif olunmuşdur.
Ümumiyyətlə, hümanitar və ictimai elmlər bölməsi əməkdaşlarının il ərzində 191 kitabı, 2151 elmi məqaləsi çap edilmişdir. Kitablardan ikisi, məqalələrdən isə 40-ı xaricdə çıxmışdır. Alimlərimizin müxtəlif beynəlxalq elmi forumlarda məruzələri dinlənilmişdir.
Bölmənin rəhbəri beynəlxalq əlaqələrdən, muzeylərdə aparılan elmi- kütləvi işlərdən, mərkəzi elmi kitabxananın, Terminologiya Komissiyasının fəaliyyətindən də danışmışdır. Məkkə, Los-Anceles şəhərlərindəki, habelə Pakistan kitabxanalarındakı Şərq əlyazmalarının kataloqları əldə edilmiş, İslamabadda saxlanılan 21, Vyanada saxlanılan 17 Azərbaycan əlyazmasının mikrofilmi alınmışdır. Ağqoyunlu dövlətinin tarixinə aid bir əlyazmanın mikrofilmi isə Almaniyadan gətirilmişdir. Mərkəzi Elmi Kitabxana dünyanın 60-a yaxın dövlətinin 558 təşkilatı, görkəmli alim və mədəniyyət xadimləri ilə kitab və informasiya mübadiləsi aparmışdır. Nəsimi Adına Dilçilik İnstitutu Xaricdə Yaşayan Azərbaycanlılarla İş üzrə Dövlət Komitəsinin və Oslo Universitetinin xahişi ilə Norveçdə yaşayan 20-dək soydaşımız üçün Azərbaycan dili və ədəbiyyatı, məhkəmə dili, ictimai-siyasi və hüquq terminologiyası və sair mövzularda 30 saatlıq ixtisas kursu təşkil etmişdir.
Sonra çıxışlar olmuş, müvafiq qərar qəbul edilmişdir.
İclasda Azərbaycan Tarixi Muzeyinin Nizamnaməsi təsdiq olunmuşdur.
AMEA-nın prezidenti akademik Mahmud Kərimov iclasa yekun vurmuşdur.
Bölmənin digər xəbərləri
