AZƏRTAC-ın müxbiri Astanadan xəbər verir ki, burada Asiya-Sakit okean Forumunun 5-ci iclası keçirilmişdir. Forumda Qazaxıstan ekoloji problemlərinin həlli üçün beynəlxalq təşkilatlara müraciət etmişdir. Ətraf mühitin mühafizəsi naziri Aytkul Samanova forumdakı çıxışında demişdir ki, Aral dənizini bərpa etmək mümkün deyil, lakin buradakı ekoloji vəziyyəti sabitləşdirmək zəruridir. Onun sözlərinə görə, Qazaxıstan Aral dənizi hövzəsində ekoloji və sosial-iqtisadi vəziyyətin yaxşılaşdırılması proqramını işləyib hazırlamışdır. İndi su kəmərinin tikintisi gedir və bu kəmər vasitəsilə 148 yaşayış məntəqəsi içməli su ilə təmin olunacaq.
A.Samakovanın sözlərinə görə, Aral regionunda 600 min adam ekoloji fəlakət zonasında yaşayır. Son 30 il ərzində Aralın radiusu 150 km azalmış, nəticədə 30 min kv km ərazi səhralığa çevrilmişdir. O demişdir:
-Aral dənizində suyun səviyyəsini indiki kimi saxlamaq, Sırdərya çayının dayazlaşmasının və Aralyanı torpaqların korlanmasının qarşısının alınması üçün beynəlxalq təşkilatların köməyi lazımdır.
