ATƏT PA-nın vitse-prezidenti Yunanıstanda insan haqları və media azadlığı məsələsini qaldırıb
Bakı, 25 noyabr, AZƏRTAC
ATƏT PA-nın vitse-prezidenti və Cənub-Şərqi Avropa üzrə xüsusi nümayəndəsi, Milli Məclisin deputatı Azay Quliyev Yunanıstanda parlament, hökumət və siyasi partiyaların nümayəndələri ilə silsilə görüşlər keçirib.
AZƏRTAC xəbər verir ki, bu barədə ATƏT PA-nın rəsmi saytı məlumat yayıb.
Məlumatda bildirilir ki, Azay Quliyev Yunanıstanın daxili işlər naziri Makis Voridis, miqrasiya və əmək naziri Notis Mitraçıs, parlamentin vitse-spikeri Karalampos Atanasios, Baş nazirin xüsusi nümayəndəsi Konstantin Karidis, xarici işlər nazirliyinin Baş katibi Temistoklis Demiris, əsas müxalifət partiyasının nümayəndəsi və sabiq xarici işlər naziri Corc Katrigalos, digər rəsmi şəxslərlə keçirdiyi görüşdə regional təhlükəsizlik və əməkdaşlıq məsələləri ətraflı müzakirə olunub.
Görüşlərdə həmçinin Qərbi Balkanda yaşanan son gərginlik, Yunanıstanda gələcək seçkilər, regional əməkdaşlıq imkanları diqqət mərkəzində olub. Afina ilə Skopye arasında Şimali Makedoniyanın ad məsələsinin danışıqlar yolu ilə həllini tapdığı təqdir olunub, region ölkələrinin Avropa İttifaqına üzvlüyünün bu bölgənin gələcək inkişafı üçün zəmanət ola biləcəyi vurğulanıb.
Azay Quliyev Bosniya və Herseqovinada artan gərginlik fonunda bölgə ölkələrinin daha yaxından əməkdaşlıq etmələrinin vacibliyini vurğulayıb, 2023-cü ildə Şimali Makedoniyanın ATƏT-ə sədrlik etməsinin Qərbi Balkan ölkələrində problemlərin səmərəli həlli baxımından yeni imkanlar yaratdığını bildirib.
ATƏT PA-nın xüsusi nümayəndəsi miqrasiya və əmək naziri ilə görüşdə miqrasiya sahəsində ATƏT PA ilə əməkdaşlığın dərinləşdirilməsi ətraflı müzakirə olunub. Bildirilib ki, qaçqın və məcburi köçkün problemi ATƏT ərazisində ən ciddi humanitar problem kimi qalmaqdadır. Həmçinin bu problemin səmərəli həlli üçün üzv ölkələr səylərini birləşdirməlidir.
Azay Quliyev nazirlər, parlament nümayəndələri və müxalifət partiyaları təmsilçiləri ilə keçirdiyi görüşdə Yunanıstanda insan hüquqları, mətbuat azadlığı və qanunun aliliyi məsələləri, son vaxtlar bu sahədə yaşanan problemləri, həmçinin məhdudiyyətləri ətraflı müzakirə edib. Bu problemlərin həllində ATƏT PA-nın dəstəyini və iştirakını təklif edib.
ATƏT PA-nın yaydığı məlumatda o da qeyd olunur ki, Azay Quliyev görüşlər zamanı iqtisadi və təhlükəsizlik məsələlərini, seçki islahatlarını yunan tərəfdaşları ilə müzakirə edib və mövcud çağırışların qarşısının alınmasında parlament diplomatiyasının rolundan danışıb.
Eyni zamanda qeyd olunub ki, bu, Azay Quliyevin ATƏT PA-nın Cənub-Şərqi Avropa üzrə xüsusi nümayəndəsi kimi ilk səfəridir.
Bölmənin digər xəbərləri
