Avropa İttifaqı Yaponiya məhsullarına məhdudiyyətləri tam aradan qaldırıb
Bakı, 3 avqust, AZƏRTAC
Avropa İttifaqı, İslandiya və Norveç “Fukusima-1” atom elektrik stansiyasında baş vermiş qəzadan sonra Yaponiya məhsullarına qarşı tətbiq edilən məhdudiyyətləri tam aradan qaldırıb.
AZƏRTAC xəbər verir ki, bu barədə Yaponiya Xarici İşlər Nazirliyi məlumat yayıb.
“Avqustun 3-də Yaponiyadan ərzaq idxalına qoyulan məhdudiyyətlərin aradan qaldırılması üzrə Avropa İttifaqının qərarı qüvvəyə minib. Məhdudiyyətlər 2011-ci ildə “Fukusima-1” AES-də baş verən qəza ilə əlaqədar tətbiq edilmişdi. Aİ-nin ardından Norveç və İslandiya da məhdudiyyətləri ləğv edib. Yaponiya hökuməti Avropa İttifaqının və digər ölkələrin müvafiq qərarlarını alqışlayır”, - deyə qurumun məlumatında bildirilir.
Xatırladaq ki, 2011-ci il martın 11-də Sakit okeanda baş verən güclü zəlzələ və sunami Yaponiyanın “Fukusima-1” atom elektrik stansiyasının enerji təchizatı və soyutma sistemini sıradan çıxarıb. Nəticədə üç enerji blokunun reaktorlarında nüvə yanacağı əriyərək qoruyucu qabığı deşib. Hidrogen partlayışları dördüncü bloku zədələyib. Radioaktiv maddələrin sızması ətraf mühitin şüalanmasına və çirklənməsinə səbəb olub. AES-in 2050-ci ilədək tam sökülməsi planlaşdırılır.
Bölmənin digər xəbərləri
