Avropa Qran-pri yarışlarının trekinə daxil olan küçələrdə təmir-tikinti işləri davam edir
Bakı, 12 fevral, AZƏRTAC
“Formula-1” üzrə Avropa Qran-pri yarışlarının Azərbaycandakı təşkilatçısı “Bakı Şəhər Halqası” şirkəti cari ilin iyununda keçiriləcək bu mötəbər idman hadisəsi ilə bağlı hazırlıq işlərini davam etdirir. Paytaxtın yarış trekinin keçiriləcəyi mərkəzi küçələrində təmir-tikinti işləri qismən həyata keçirilir.
AZƏRTAC xəbər verir ki, Neftçilər prospektinin Azneft dairəsinin “Four Seasons” mehmanxanasına baxan tərəfində asfalt qatının dəyişdirilməsi ilə əlaqədar aparılan təmir işləri səbəbindən fevralın 13-də səhər saat 06:00-dan etibarən Niyazi küçəsinin bu dairədən İstiqlaliyyət küçəsinədək olan hissəsində nəqliyyatın hərəkəti tamamilə dayandırılacaq. Həmin gün həm Neftçilər prospekti, həm də İstiqlaliyyət küçəsi avtomobillərin hərəkətinə açıq olacaq. Niyazi küçəsində tətbiq olunan bu qadağa fevralın 14-də səhər saatlarında aradan qaldırılacaq.
Fevralın 14-də səhər saatlarından etibarən İstiqlaliyyət küçəsinin Niyazi küçəsi və Azərbaycan prospekti ilə olan kəsişmələri arasında qalan hissəsində nəqliyyatın hərəkətinə icazə verilməyəcək. Burada qoyulmuş məhdudiyyət fevralın 15-i səhər saatlarınadək davam edəcək.
Yarışdan əvvəl salınacaq və “Formula-1” standartına cavab verəcək yollar daimidir, Qran-pridən sonra paytaxt sürücülərinin istifadəsində olacaq.
Bölmənin digər xəbərləri
